বঙাইগাঁৱত সদৌ অসম সুলভ মূল্য ব্যৱসায়ী সন্থাৰ ৰূপালী জয়ন্তী বৰ্ষৰ অধিৱেশন আৰম্ভ

সদৌ অসম সুলভ মূল্যৰ ব্যৱসায়ী সন্থাৰ ৰূপালী জয়ন্তী বৰ্ষৰ অধিৱেশনখন আজিৰে পৰা দুদিনীয়া কাৰ্যসূচীৰে  বঙাইগাঁও চহৰৰ বৰপাৰা ৰাজহুৱা খেলপথাৰত অনুষ্ঠিত হৈছে৷ বঙাইগাঁও জিলা সুলভ মূল্য ব্যৱসায়ী সন্থাৰ আতিথ্যত অনুষ্ঠিত ৰূপালী জয়ন্তী অধিৱেশনৰ কাৰ্যসূচী অনুসৰি আজি প্ৰথমদিনা পুৱা অভ্যৰ্থনা সমিতিৰ সভাপতি দিপু চৌধুৰীয়ে পতাকা উত্তোলনেৰে কাৰ্যসূচীৰ শুভাৰম্ভ কৰে৷ লগতে সন্থাৰ ৰাজ্যিক সমিতিৰ সভাপতি বিষ্ণু দাসকে ধৰি বিভিন্ন জিলাৰ পৰা অহা জিলা সমিতিৰ বিষয়ববীয়াই আন ২৪খন পতাকা উত্তোলন কৰে৷

ইয়াৰ পিচতে বন্তি প্ৰজ্বলন কৰা হয়৷ আনহাতে, আবেলি বীৰঝৰা পাব্লিক লাইব্ৰেৰীত কাৰ্যনিৰ্বাহক সভা অনুষ্ঠিত হোৱাৰ লগতে সন্ধিয়া প্ৰতিনিধি সভা অনুষ্ঠিত হয়৷ লগতে সন্ধিয়া প্ৰতিনিধি শিবিৰ মুকলি কৰা হয়৷ দ্বিতীয়দিনাৰ কাৰ্যসূচী অনুসৰি কাইলৈ পুৱা বৰপাৰা ৰাজহুৱা খেলপথাৰত ছহিদ তৰ্পণ আৰু মাল্যাৰ্পণ কাৰ্যসূচী মুকলি কৰিব ছহিদ বাবুল কুমাৰ ব্ৰহ্মৰ সহধৰ্মিণী সবিতা ব্ৰহ্ম আৰু সদৌ ভাৰত সুলভ মূল্য ব্যৱসায়ী ফেডাৰেচনৰ উপাধ্যক্ষ দেবেন বড়োৱে৷ এই কাৰ্যসূচীৰ পিচতে অনুষ্ঠিত হ'ব মুকলি সভা৷ সদৌ অসম সুলভ মূল্য ব্যৱসায়ী সন্থাৰ সভাপতি বিষ্ণু দাসৰ সভাপতিত্বত অনুষ্ঠিত হ'বলগীয়া মুকলি সভাত স্থানীয় বিধায়ক ফণীভূষণ চৌধুৰী আৰু সদৌ ভাৰত সুলভ মূল্য ব্যৱসায়ী ফেডাৰেচনৰ সাধাৰণ সম্পাদক বিশ্বম্ভৰ বসুৱে মুখ্য অতিথি হিচাপে উপস্থিত থাকিব৷