বিলাসীপাৰাত নিৰ্দলীয় কাউন্সিলাৰ ৰৌচনাৰা বেগমৰ বিজেপিত যোগদান

বিলাসীপাৰাৰ পৰা জহিৰুল ইছলাম

পঞ্চায়ত নিৰ্বাচনত সদ্যঘোষিত ফলাফলত আনন্দ নগৰ বাঙালীপাৰা গাঁও পঞ্চায়তৰ নৱনিৰ্বাচিত কাউন্সিলাৰ ৰৌচনাৰা বেগমৰ নেতৃত্বত শতাধিক ৰাইজে আনুষ্ঠানিকভাৱে বিজেপি দলত যোগদান কৰে ।

সংখ্যালঘূ এলেকাত কংগ্ৰেছ দলৰ প্ৰতি মোহভংগ হৈ শেহতীয়া পঞ্চায়ত নিৰ্বাচনত নিৰ্দলীয় প্ৰাৰ্থী হিচাপে প্ৰতিদ্বন্দ্বিতা কৰি নিৰ্বাচিত হোৱা পঞ্চায়ত সভাপতি, কাউন্সিলাৰ আৰু ৱাৰ্ড সদস্যই পঞ্চায়ত নিৰ্বাচনৰ ফলাফল ঘোষণা হোৱাৰ পিছৰ পৰাই বহুতে আনুষ্ঠানিকভাৱে বিলাসীপাৰা পূব সমষ্টিৰ বিধায়ক অশোক কুমাৰ সিংহীৰ নেতৃত্বত বিজেপি দলত যোগদান কৰে ।

আনন্দ নগৰ বাঙালীপাৰা গাঁও পঞ্চায়তৰ নৱনিৰ্বাচিত কাউন্সিলাৰ ৰৌছনাৰা বেগমৰ লগতে খুদিগাঁও প্ৰথম  খণ্ডৰ নিৰ্দলীয় সদস্য এগৰাকী দেওবাৰে বিয়লি বিলাসীপাৰা পূব সমষ্টিৰ বিধায়ক অশোক কুমাৰ সিংহীৰ নিজ বাসভৱনত আনুষ্ঠানিকভাৱে বিজেপি দলত যোগদান কৰে ।

যোগদান কৰা প্ৰতিগৰাকী দলীয় সদস্যক অন্তৰ্ভুক্ত কৰি ফুলাম গামোচা, দলীয় অংগ বস্ত্ৰ আৰু টুপী পিন্ধাই আদৰণি জনায় বিজেপিৰ বিধায়ক অশোক কুমাৰ সিংহীয়ে ।

বিধায়কগৰাকীয়ে বিজেপি দলত যোগদান কৰা প্ৰতিনিধিৰ লগতে ৰাইজক আঁকোৱালি লৈ ভাষণ প্ৰসংগত দলীয় নীতি-আদৰ্শেৰে সমভাৱে সংখ্যালঘু এলেকাত কাম কৰি যাব বুলি আশ্বাস প্ৰদান কৰে ।

লগতে বিজেপিৰ বাহিৰে বেলেগ দলৰ নিৰ্বাচিত প্ৰতিনিধিয়ে তেনে কাম কৰিব নোৱাৰে বুলিও তেওঁ উল্লেখ কৰে ।