নাহৰকটীয়াত বিজেপিৰ বিজয় উৎসৱ : অগপ লাউগছ

নামৰূপৰ পৰা সমীৰণ বৰুৱা

পঞ্চায়তৰ নিৰ্বাচনত বিজেপিয়ে দেখুওৱা অভূতপূৰ্ব সাফল্যৰ বাবে শুকুৰবাৰে নাহৰকটীয়াত আয়োজন কৰা হয় বিজয় উৎসৱ । উল্লেখ্য যে নাহৰকটীয়াৰ অগপ বিধায়ক নৰেন সোণোৱালে কিছুদিনৰ পূৰ্বে নাহৰকটীয়াৰ এক নিৰ্বাচনী সভাত কংগ্ৰেছ-অগপ ককাই-ভাই বুলি মন্তব্য কৰিছিল আৰু সেইদিনাই ৰাজ্যিক বিজেপিয়ে সিদ্ধান্ত গ্ৰহণ কৰিছিল যে যদিহে বিজেপিয়ে পঞ্চায়ত নিৰ্বাচনত ভাল ফলাফল দেখুৱাব পাৰে তেন্তে এই বিজয় উৎসৱ নাহৰকটীয়াতে পালন কৰিব ।

এই মন্তব্য ৰাজ্যিক সভাপতি ৰঞ্জিত দাসৰ । আনহাতে, এই অনুষ্ঠানতে বিজেপিৰ বিজয়ী সদস্যসকলক সম্বৰ্ধনাও জনোৱা হয় । আনহাতে, ডিব্ৰুগড়ৰ বিধায়ক প্ৰশান্ত ফুকনে কয় যে অগপই মিত্ৰ দলত থাকি চিপৰাং মাৰিলে আৰু সেই কথাখিনি নাহৰকটীয়াবাসীৰ লগতে অসমবাসীয়ে বুজি পালে ৷ সেইবাবেই এই দশা হ'ল অগপৰ ।

বিজেপি পাৰ্টী হেন্দালি, বিজেপি গছত বগাই থকা নাই বুলি উল্লেখ কৰি তেওঁ কয় যে অগপ যে লাউগছ সেয়া বৰ্তমান সময়ত স্পষ্ট হৈ পৰিছে । এই অনুষ্ঠানত সাংসদ ৰামেশ্বৰ তেলী, দুলীয়াজানৰ বিধায়ক তেৰছ গোৱালা, টিংখঙৰ বিধায়ক বিমল বড়া, বিজেপিৰ ৰাজ্যিক কাৰ্যনিৰ্বাহক ৰঞ্জিত বৰুৱা প্ৰমুখ্যে কেইবাগৰাকীও গণ্য-মান্য ব্যক্তি উপস্থিত থাকে ।