ডিমৌত বাছ-ট্ৰেভেলাৰৰ মুখা-মুখী সংঘৰ্ষ : প্ৰাণ হেৰুৱালে ১১জনকৈ যাত্ৰীয়ে

নিউজ ডেস্ক :
আজি পুৱাই এক ভয়ংকৰ দুৰ্ঘটনা সংঘটিত হয় শিৱসাগৰ জিলাৰ ডিমৌত।দুৰ্ঘটনাটো ইমানেই ভয়ংকৰ আছিল যে দুৰ্ঘটনাৰ ফলত থিতাতে প্ৰাণ হেৰুৱাবলগীয়া হ'ল ১১জনকৈ লোকে।জানিব পৰা মতে সোমবাৰে পুৱা ৮.৩০বজাত গোলাঘাটৰ পৰা ডিব্ৰুগড় অভিমুখে গৈ থকা নামবৰ নামৰ চিটি বাছ খনৰ সৈতে ডিব্ৰুগড়ৰ পৰা শিৱসাগৰ অভিমুখে আহি থকা এখন ট্ৰেভেলাৰ মুখামুখী সংঘৰ্ষত পতিত হয়। দুৰ্ঘটনাতো ইমানেই ভয়ংকৰ আছিল যে ডিব্ৰুগড়ৰ পৰা শিৱসাগৰ অভিমুখে আহি থকা এছ২৩বিচি ৬৮৭৮নম্বৰৰ ট্ৰেভেলাৰ খনে সংঘৰ্ষৰ ফলত নিয়ন্ত্ৰণ হেৰুৱাই দ-খাৱৈত বাগৰি পৰে। ইফালে দুৰ্ঘটনাৰ সংঘটিত কৰা বাছ খনৰ নম্বৰ হৈছে এছ০৫চি ৫৯৯৯। 

আনহাতে দুৰ্ঘটনা সংঘটিত হোৱাৰ পিছতেই বাছখনৰ ছালক জন পলায়ন কৰা বুলি জানিব পৰা গৈছে।প্ৰত্যক্ষদৰ্শীৰ মতে বৰষুণ দি থকা বাবেই তীব্ৰবেগী চিটিবাছ খনে খুন্দা মাৰিছিল বিপৰীত দিশৰ পৰা অহা ট্ৰেভেলাৰ খনক।

ইফালে দুৰ্ঘটনাটোত প্ৰায় ১৫জনকৈ যাত্ৰী আহত হৈছে।আহত যাত্ৰী সকলক স্থানীয় ৰাইজৰ সহযোগত আৰক্ষীয়ে উদ্ধাৰ কৰি ডিব্ৰুগড় আৰু শিৱসাগৰলৈ প্ৰেৰণ কৰিছে। ইফালে ট্ৰেভেলাৰ খনত থকা নিহত যাত্ৰী সকলৰ নিথৰদেহো ইতিমধ্যে উদ্ধাৰ কৰিছে স্থানীয় ৰাইজৰ সহযোগত আৰক্ষীয়ে।