বটদ্ৰৱা থান-দৌল মন্দিৰত সেৱা জনাই গৌৰৱ গগৈৰ মনোনয়ন দাখিল

নগাঁৱৰ পৰা ঋতুপৰ্ণ শৰ্মা

আজি নগাঁও জিলা ৰিটাৰ্নিং বিষয়াৰ ওচৰত মনোনয়ন পত্ৰ দাখিল কৰে কলিয়াবৰ লোকসভা সমষ্টিৰ ভাৰতীয় কংগ্ৰেছ দলৰ প্ৰাৰ্থী তথা বৰ্তমানৰ সাংসদ গৌৰৱ গগৈয়ে৷ মনোনয়ন-পত্ৰ দাখিলৰ পূৰ্বে সাংসদগৰাকী আজি পুৱাই উপস্থিত হয়হি মহাপুৰুষ শ্ৰীমন্ত শঙ্কৰদেৱ গুৰুজনাৰ জন্মস্থান দ্বিতীয় বৈকুন্ঠখ্যাত বটদ্ৰৱা থানত৷ 

যুৱ সাংসদগৰাকীক বটদ্ৰৱা থানত পৰিচালনা সমিতিৰ হৈ সভাপতি দেৱানন্দ দেৱগোস্বামী, সাধাৰণ সম্পাদক ইন্দ্ৰমোহন বৰুৱা, সহকাৰী সম্পাদক যোগেন বৰুৱা, দৌলযাত্ৰা মহোৎসৱৰ সাংস্কৃতিক সম্পাদক মণ্টু বৰা প্ৰমুখ্যে কাৰ্যকৰী সদস্যসকলে ধৰ্মবস্ত্ৰ, শৰাই, স্মৃতিগ্ৰন্থ, বটদ্ৰৱা থান বৰ্ণনাৰ গীত আদিৰে উষ্ম সম্বৰ্ধনা জনায়৷ 

ইয়াৰ পিছতে গৌৰৱ গগৈয়ে বটদ্ৰৱা থানত শৰাই-নৈবেদ্য,  ঘিউৰ বন্তি চাকি আগবঢ়াই সেৱা নিবেদন কৰে৷ সত্ৰাধিকাৰ প্ৰমুখ্যে কেৱলীয়া ভকতসকলে তেওঁৰ মনোকামনা পূৰণাৰ্থে আশিস নিৰ্মালী প্ৰদান কৰি গোসাঁইৰ মূৰত দিয়া ফাকু সানি নিৰ্মালী প্ৰদান কৰে৷ ইয়াৰ পিছতে সাংসদগৰাকী দৌল মন্দিৰলৈ যায় আৰু তাতো দৌল গোসাঁইৰ শ্ৰীচৰণত সেৱা আগবঢ়াই ভকতসকলৰ পৰা আশীৰ্বাদ আৰু ফাকু নিৰ্মালী গ্ৰহণ কৰে৷ 

দৌলযাত্ৰা মহোৎসৱ উপলক্ষে বটদ্ৰৱা থানত সমবেত অগণন ভক্তপ্ৰাণ ৰাইজে গৌৰৱ গগৈক কাষতে পাই মৰম, আদৰ, আশীৰ্বাদেৰে উপচায় পেলোৱা পৰিলক্ষিত হয়৷ সাংসদগৰাকীয়েও অতি আন্তৰিকাৰে সকলোৰে লগত মত বিনিময় কৰি আগন্তুক সময়ৰ বাবে আশীৰ্বাদ বিচাৰে৷ পিছত নগাঁও, ধিং, বটদ্ৰৱাৰ সংবাদসেৱীসকলৰ লগত মত বিনিময় কৰি সকলোৰে শুভকামনা গ্ৰহণ কৰা পৰিলক্ষিত হয়৷