কংগ্ৰেছৰ প্ৰাক্তন সম্পাদক বিচিত্ৰ চৌধুৰীয়ে যোগ দিলে বিজেপিত

আজি গুৱাহাটীৰ হেঙেৰাবাৰীস্থিত ৰাজ্যিক বিজেপিৰ কাৰ্যালয়ত আয়োজন কৰা এক অনুষ্ঠানত চৌধুৰীয়ে বিজেপিত যোগদান কৰে । বিজেপিৰ ৰাজ্যিক সভাপতি ৰঞ্জিত কুমাৰ দাসে তেওঁক দলৰ মজিয়ালৈ স্বাগতম জনোৱাৰ লগতে গামোচা আৰু বিজেপিৰ দলীয়া পতাকাৰে আদৰণি জনায় । 

উল্লেখযোগ্য যে, বিচিত্ৰ চৌধুৰীয়ে ১৯৯৮ চনৰ পৰা ২০০০ চনলৈ দৈনিক অসম কাকতৰ ষ্টাফ ৰিপোৰ্টাৰ হিচাপে কৰ্মৰত আছিল । দলত যোগদান কৰিয়ে চৌধুৰীয়ে স্ব-ইচ্ছাৰে বিজেপিত যোগদান কৰা বুলি উল্লেখ কৰি লগতে কয়, “মই কোনো মন্ত্ৰী-বিধায়ক হোৱাৰ আশাত বিজেপিত যোগদান কৰা নাই । বিজেপি দলৰ নীতি আদৰ্শত অনুপ্ৰাণিত হৈ বিজেপিত যোগদান কৰিছো ।”ইপিনে, পঞ্চায়ত নিৰ্বাচনৰ পূৰ্বে এনেদেৰ কংগ্ৰেছী নেতাই বিজেপিত যোগদান কৰা বিষয়টোৱে যথেষ্ট চৰ্চা লাভ কৰিছে ।