পথ দুৰ্ঘটনাত গুৰুতৰভাৱে আহত জ্যেষ্ঠ সাংবাদিক ভূপেন গোস্বামী

মঙলবাৰে পুৱা গুৱাহাটীৰ পাঞ্জাবাৰী বাঘৰবড়ীত সংঘটিত এটা পথ দুৰ্ঘটনাত জ্যেষ্ঠ সাংবাদিক,'ৰাষ্ট্ৰীয় খবৰ'ৰ উত্তৰ-পূবৰ সংবাদদাতা তথা নেছনেল ইউনিয়ন অব জাৰ্ণেলিষ্ট ইণ্ডিয়া(এনইউজেআই)ৰ ৰাষ্ট্ৰীয় উপ-সভাপতি ,'জা'ৰ মুখ্য উপদেষ্টা ভূপেন গোস্বামী গুৰুতৰভাৱে আহত হয় । বৰ্তমান ছয়মাইলস্থিত জিএনআৰচিত  চিকিৎসাধীন সাংবাদিকগৰাকী বিপদমুক্ত বুলি জৰুৰী বিভাগৰ চিকিৎসকে জানিবলৈ দিছে।ঘটনাৰ বিৱৰণি মতে শ্ৰীমন্ত শংকৰদেৱ কলাক্ষেত্ৰত অনুষ্ঠিত হৈ থকা তৃতীয় আন্ত:ৰাষ্ট্ৰীয় চলচ্চিত্ৰ মহোৎসৱৰ এটা অনুষ্ঠানত অংশগ্ৰহণ কৰি নিজৰ 'এএছ ০১ এক্স ৩৮০৯' মটৰ চাইকেলেৰে আহি থকাৰ সময়ত পিছফালৰ পৰা এখন পানী কঢ়িওৱা অ'টভানে তীব্ৰ বেগেৰে খুন্দা মৰাৰ ফলত দুৰ্ঘটনাটো সংঘটিত হয় । পিছত স্থানীয় লোকৰ সহযোগত পৰিয়ালৰ লোকে কঁকাল,ভৰি আৰু মূৰত গুৰুতৰভাৱে আঘাতপ্ৰাপ্ত সাংবাদিকজনক জিএনআৰচি হাস্পতালত ভৰ্তি কৰায়। জাৰ্নেলিষ্ট এছ'চিয়েচন অব আছাম ('জা')ৰ সভাপতি ধীৰেন্দ্ৰ নাথ চক্ৰৱৰ্তী, 'জা'ৰ গুৱাহাটীৰ সদস্য সাংবাদিকসকলে আহত গোস্বামীৰ আশু আৰোগ্য কামনা কৰাৰ লগতে নিয়ন্ত্ৰণহীন গাড়ীচালকৰ বিৰুদ্ধে কঠোৰ ব্যৱস্থা গ্ৰহণৰ বাবে চৰকাৰৰ ওচৰত দাবী জনাইছে ।