আন্ত:ৰাষ্ট্ৰীয় উদ্ভাৱনীমূলক প্ৰতিযোগিতাত দ্বিতীয় স্থান দখল কৰা চম্পক বৰাক সচেতন যুৱ মঞ্চৰ সম্বৰ্ধনা

আমেৰিকাৰ মহাকাশ গৱেষণা প্ৰতিষ্ঠান 'নাছা'ৰ উদ্যোগত 'ট্ৰেক ব্ৰীফ'-এ আয়োজন কৰা আন্ত:ৰাষ্ট্ৰীয় উদ্ভাৱনীমূলক প্ৰতিযোগিতা 'ক্ৰিয়েট দ্য ফিউছাৰ' প্ৰতিযোগিতাত ভাৰতবর্ষক প্ৰতিনিধিত্ব কৰি দ্বিতীয় স্থান দখলৰে ভাৰত, অসম তথা উত্তৰ গুৱাহাটীলৈ  গৌৰৱ কঢ়িয়াই অনা উত্তৰ গুৱাহাটীৰ উদ্ভাৱক চম্পক বৰাক ২০ অক্টোবৰত উত্তৰ গুৱাহাটীৰ আগশাৰীৰ সক্ৰিয় সামাজিক সংগঠন সচেতন যুৱ মঞ্চই তেওঁৰ মাজগাঁওস্থিত বাসভৱনত সম্বৰ্ধনা জনায়।বৰাক গামোচা,জাপি আৰু এখন সম্বৰ্ধনা পত্ৰৰে সম্বৰ্ধনা জনাই সচেতন যুৱ মঞ্চৰ সদস্যসকলে।উল্লেখ্য যে উদ্ভাৱক চম্পক বৰাই 'অটোমেটিক কাউন্টিং ডিভাইছ' উদ্ভাৱন কৰিছে আৰু এই ডিভাইছটোক লৈ তেওঁ প্ৰতিযোগিতাত অংশগ্ৰহণ কৰিছিল।এই ডিভাইছটোৰ বাবেই তেওঁ উক্ত বিশ্বমানৰ প্ৰতিযোগিতাত দ্বিতীয় স্থান লাভ কৰিছে।সচেতন যুৱ মঞ্চই চম্পক বৰাৰ লগতে তেওঁৰ উদ্ভাৱনীমূলক কাম-কাজত সকলো সময়তে সহযোগিতা আগবঢ়োৱা পিতৃ ভগৱান বৰা আৰু জ্যেষ্ঠ ভাতৃ ত্ৰৈলোক্য বৰাকো সম্বৰ্ধনা জনায়।ভগৱান বৰাক এখন ফুলাম গামোচা আৰু ত্ৰৈলোক্য বৰাক এটা জাপি প্ৰদান কৰি সম্বৰ্ধনা জনোৱা হয়।চম্পক বৰাৰ উদ্ভাৱনক বিশ্ব দৰবাৰত পৰিচয় কৰি দিয়াৰ ক্ষেত্ৰত সচেতন যুৱ মঞ্চৰ সদস্যসকলে সহযোগিতা আগবঢ়াই যাব বুলি উদ্ভাৱক বৰাক আশ্বাস প্ৰদান কৰে সচেতন যুৱ মঞ্চই।