পাণ্ডুৰি আঞ্চলিক ছাত্ৰ সন্থাৰ বিশেষ অভিনন্দন অনুষ্ঠান সম্পন্ন

কামৰূপ জিলাৰ মধ্য পাণ্ডুৰি আঞ্চলিক ছাত্ৰ সন্থাৰ বিশেষ অভিনন্দন অনুষ্ঠানখনি মধ্য পাণ্ডুৰি উচ্চতৰ মাধ্যমিক বিদ্যালয়ত আজি অনুষ্ঠিত হয় । 

মধ্য পাণ্ডুৰি অঞ্চলৰ বিভিন্ন শিক্ষানুষ্ঠানৰ পৰা সদ্যঘোষিত হাইস্কুল, হাইমাদ্ৰাছা আৰু উচ্চতৰ মাধ্যমিক চূড়ান্ত পৰীক্ষাত কৃতিত্ব অৰ্জন কৰা ছাত্ৰ-ছাত্ৰীসকলক অভিনন্দন জ্ঞাপন কৰা হয় ।

পুৱা মধ্য পাণ্ডুৰি আঞ্চলিক ছাত্ৰ সন্থাৰ সভাপতি ডিম্বেশ্বৰ শৰ্মাই সদৌ অসম ছাত্ৰ সন্থাৰ পতাকা উত্তোলনেৰে কাৰ্যসূচীৰ আৰম্ভণি কৰে ৷ মধ্য পাণ্ডুৰি আঞ্চলিক ছাত্ৰ সন্থাৰ সাধাৰণ সম্পাদক জিণ্টুমণি কলিতাই ছহিদ তৰ্পণ কৰে । 

ডিম্বেশ্বৰ শৰ্মাৰ সভাপতিত্বত অনুষ্ঠিত বিশেষ অভিনন্দন অনুষ্ঠান উদ্বোধন কৰে সদৌ কামৰূপ জিলা ছাত্ৰ সন্থাৰ সাধাৰণ সম্পাদক হেমন্ত দাসে ।

তেখেতৰ ভাষণত কয় যে বৰ্তমান ব্যৱসায়িক শিক্ষা ব্যৱস্থাই শিক্ষাৰ মানদণ্ড নিম্ন কৰিছে । শিক্ষাৰ মানদণ্ড উন্নত হ'লেহে ছাত্ৰ-ছাত্ৰীসকল উপকৃত হ'ব পাৰিব ।

বৰ্তমান সময়ত ছাত্ৰ-ছাত্ৰীসকলক ভাল শিক্ষা, ভাল শিক্ষানুষ্ঠান, উপযুক্ত কৰ্মসংস্থাপনৰ ব্যৱস্থা কৰি দিব লাগিব । মানৱ সম্পদ গঢ়া শিক্ষকসকলে কিছু ক্ষেত্ৰত প্ৰাপ্যৰ বাবে আন্দোলনৰ পথ ল'বলৈ বাধ্য হৈছে ৷

এই ক্ষেত্ৰত চৰকাৰে তেওঁলোকৰ সমস্যা সমাধান কৰিব লাগিব । সদৌ অসম ছাত্ৰ সন্থাই দৰিদ্ৰ ঘৰৰ ছাত্ৰ-ছাত্ৰীক বুক-বেংকৰ জৰিয়তে শৈক্ষিক ক্ষেত্ৰত সহায় কৰি আছে বুলি সভাত উল্লেখ কৰে ৷

লগতে ছাত্ৰ-ছাত্ৰীসকলক অধ্যয়নৰ লগতে সামাজিকভাৱে দায়বদ্ধ হ'বলৈ আহ্বান জনায় । অনুষ্ঠানটোত উপস্থিত থাকি সদৌ অসম ছাত্ৰ সন্থাৰ তথ্য আৰু কাৰ্যালয় সম্পাদক ধৰ্মেশ্বৰ দাসে কয় যে ছাত্ৰ-ছাত্ৰীসকলে ডাক্তৰ, ইঞ্জিনীয়াৰ হোৱাৰ আগেয়ে প্ৰথমে মানুহ হ'ব লাগিব। তাৰপিছতহে ডাক্তৰ-ইঞ্জিনীয়াৰ ।

আমাৰ শিক্ষা ব্যৱস্থাই এচাম মানৱ  সম্পদক সমাজৰ পৰা একাষৰীয়া কৰি গৈ আছে বুলি মন্তব্য কৰি কয় যে যিকোনো কাম কৰাৰ আগতে আত্মবিশ্বাস থাকিব লাগিব ৷ তেতিয়াহে জীৱনত সফলতা আনিব পাৰিব ।

ছাত্ৰ-ছাত্ৰীসকলক শিক্ষাৰ লগতে সমাজখনৰ প্ৰতিও দায়বদ্ধ হ'বলৈ তেওঁ আহ্বান জনায় । অভিনন্দন অনুষ্ঠানত সদৌ কামৰূপ জিলা ছাত্ৰ সন্থাৰ সভাপতি দিবাকৰ কলিতাই কয় যে মোবাইলে ছাত্ৰ-ছাত্ৰীৰ শৈক্ষিক ক্ষেত্ৰত যথেষ্ট প্ৰভাৱ পেলাইছে ।

বহু ছাত্ৰ-ছাত্ৰীয়ে শিক্ষা গ্ৰহণতকৈ মোবাইলত বেছি গুৰুত্ব দিয়াৰ ফলত শিক্ষা গ্ৰহণত প্ৰভাৱ পৰিছে । লগতে কয় যে ছাত্ৰ-ছাত্ৰীসকলে 'মই পাৰিম' এই আত্মবিশ্বাস লৈ আগবাঢ়িলে সফলতা আহিবই ।

ছাত্ৰ-ছাত্ৰীসকলে ঋণাত্মক মনোভাৱেৰে কোনো কথা চিন্তা কৰিব নালাগে বুলিও তেওঁ কয় । সততাৰে ছাত্ৰ-ছাত্ৰীসকলক কৰ্মক্ষেত্ৰত দায়িত্ব আৰু কৰ্তব্য পালন কৰিবলৈ আহ্বান জনায় ।

অনুষ্ঠানটোত উপস্থিত থাকি ৰঙিয়া উচ্চতৰ মাধ্যামিক বিদ্যালয়ৰ সতীশ কাকতিয়ে ছাত্ৰ-ছাত্ৰীসকলৰ উদ্দেশ্যে শুভেচ্ছামূলক বক্তব্য প্ৰদান কৰে । ছাত্ৰ-ছাত্ৰীসকলক হিমা দাসৰ আৰ্দশেৰে আগবাঢ়ি যোৱাৰ বাবে আহ্বান জনায় ।

অনুষ্ঠানটোত সদৌ কামৰূপ জিলা ছাত্ৰ সন্থাৰ উপদেষ্টা ধীৰাজ ৰাজবংশী, মহকুমা ছাত্ৰ সন্থাৰ সভাপতি হেমেন দাস, শিক্ষা সম্পাদক তৌফিকুৰ ৰহমানসহ জিলা, মহকুমাৰ নেতৃত্ব উপস্থিত থাকে ।

অনুষ্ঠানত কৃতী ছাত্ৰ-ছাত্ৰীসকলক গামোচা আৰু অভিনন্দন-পত্ৰৰে সম্বৰ্ধনা জনোৱা হয় ।