বৰপেটাৰোড ৰেলৱে ষ্টেচনত আটক কেৰেলাৰ পৰা পলাই অহা এহাল যুৱক যুৱতী

বৰপেটাৰোডৰ পৰা ৰঞ্জিত তালুকদাৰৰ প্রতিবেদন :

বৰপেটা জিলাৰ মন্দিয়াৰ মৰ্তুজ আলী নামৰ এগৰাকী  যুৱকে সুদুৰ কেৰেলাৰ পৰা এগৰাকী যুৱতীক পলুৱাই আনি থাকোতে বৰপেটাৰোডত  ধৰা পৰাৰ এক ঘটনা আজি  পোহৰলৈ আহিছে ৷ মাথো ১৫ দিন মানৰ ভালপোৱাৰ পিছতেই মৰ্তুজ আলী নামৰ যুৱক জনৰ লগত পলাই আহিছে বিশ্বাস উপাধিৰ কলিকতাৰ এগৰাকী বঙালী  যুৱতী ৷ যুৱক- যুৱতীহালে কেৰেলাৰ পৰা আৰোনাই এক্সপ্ৰেছ ৰেলযোগে পলায়ন কৰি বৰপেটাৰোড ৰেলৱে ষ্টেচন আহি পোৱাৰ লগে লগেই  আৰক্ষীয়ে আটক কৰিবলৈ সক্ষম হয় ৷ আৰক্ষীয়ে মৰ্তুজ আলীৰ উপৰি যুৱতী গৰাকীৰ লগতে তেওঁৰ সহযোগী ওমৰ আলীকো আটক কৰে ৷ প্ৰাপ্ত ভাষ্য মতে, মন্দিয়াৰ মৰ্তুজ আলী নামৰ যুৱক গৰাকীয়ে কেৰেলাত মিস্ত্ৰী কাম কৰিবলৈ গৈ কেৰেলাত থকা  হিন্দু যুৱতী গৰাকীৰ লগত প্ৰেমৰ সম্পৰ্ক গঢ়ি তোলে৷ উল্লেখ্য যে  দ্বাদশ শ্ৰেণীত পঢ়ি থকা কলিকতাৰ যুৱতী গৰাকীৰ পিতৃ কৰ্মসুত্ৰে কেৰেলাত  থকাৰ বাবে  প্ৰথমবাৰৰ বাবে এমাহ পূৰ্বে কেৰেলালৈ ফুৰিবলৈ গৈছিল যুৱতী গৰাকীৰ লগতে পৰিয়ালৰ আন সকল সদস্য ৷ কেৰেলাত গৈ প্ৰতিবেশী এই আলী নামৰ যুৱক জনৰ লগত প্ৰেমৰ সম্পৰ্ক হোৱাত যুৱতী গৰাকীক লৈ পলায়ন কৰে মৰ্তুজ আলীয়ে ৷ 
স্মতৰ্ব্য যে কলিকতাৰ এই যুৱতী গৰাকীৰ লগত  আলিপুৰদুৱাৰৰ নিউটন সৰকাৰ নামৰ যুৱক এজনৰ লগত  বিয়াৰ আলোচনা সম্পূৰ্ণ হৈছিল ৷ ডিচেম্বৰ মাহৰ এক তাৰিখত যুৱতী গৰাকীৰ লগত বিয়াৰ দিন ধাৰ্য কৰা হৈছিল ৷ আনহাতে, যুৱতী গৰাকী নিখোজ হোৱাৰ পিছতেই কেৰেলাত যুৱতী গৰাকীৰ পিতৃয়ে এক গোচৰ ৰুজু কৰিছিল যোৱা ৮ অক্টোবৰত ৷ এতিয়া গোটেই আইনী প্ৰক্ৰিয়াটো কেৰেলাৰ অন্তৰ্গত হোৱাত দুই এদিনতে কেৰেলাৰ পৰা আৰক্ষীৰ লোক আহি বৰপেটাৰোড পাবহি ৷ ইপিনে যুৱতী গৰাকীৰ লগত বিবাহ ঠিক হোৱা নিউটন সৰকাৰো আহি সম্প্ৰতি বৰপেটাৰোডত উপস্থিত হৈছে। নিউটন সৰকাৰে জনোৱা মতে, তেওঁৰ লগত প্ৰতিদিনে সুন্দৰকৈ মোবাইলত কথা বতৰা হৈ থকা তেওঁৰ ভাবী পত্নীৰ হঠাতে কি হৈ গ’ল তেওঁ ধৰিবই পৰা নাই ৷ আনকি যোৱা ৭ অক্টোবৰটো তেওঁৰ লগত ভালদৰে কথা বতৰা হৈছিল যুৱতী গৰাকীৰ ৷ তাৰ পিছ দিনাৰ পৰাই যুৱতী গৰাকীৰ মোবাইল চুইছ অফ হৈ সংযোগ বিছিন্ন হৈ পৰিছিল ৷ আনহাতে, এই ঘটনাৰ কথা জানিব পাৰি শিৱ সেনাৰ বৰপেটা জিলা সমিতিৰ বিষয়ববীয়া সকল উপস্থিত হৈ ঘটনাৰ উচিত তদন্ত কৰি দোষীক উপযুক্ত শাস্তি বিহাৰ দাবী জনাইছে ৷