মৰিগাঁৱত বেংগল কুইনৰ খিতাপ অৰ্জন কৰা অসম কণ্যা অংকিতা দত্তক সম্বৰ্দ্ধনা

মৰিগাঁৱৰ পৰা জিতু মনি নাথৰ প্রতিবেদন :

মৰিগাওঁ জিলা সমবায় সমিতি সমূহৰ সৌজন্যত আৰু খাদ্য অসামৰিক যোগান আৰু গ্ৰাহক পৰিক্ৰমা বিভাগ মৰিগাঁৱৰ উদ্যোগত অলপতে বেংগল কুইনৰ খিতাপ অৰ্জন কৰা অসম কণ্যা তথা মৰিগাঁৱৰ জিয়ৰী অংকিতা দত্তক বৃহস্পতিবাৰে বিপুল ভাবে সম্বৰ্দ্ধনা জনোৱা হয়। এই উপলক্ষে মৰিগাঁও নগৰৰ পবিতৰা হাটত অনুষ্ঠিত হয় এখনি সম্বৰ্দ্ধনা সভা। মৰিগাঁৱৰ সমবায় সমিতি সমূহক লৈ গঠিত সন্থাৰ সভাপতি জীৱন বৰাৰ সভাপতিত্বত অনুষ্ঠিত সভাখনত মৰিগাঁও খাদ্য অসামৰিক যোগান আৰু গ্ৰাহক পৰিক্ৰমা বিভাগ ভাৰপ্ৰাপ্ত সহকাৰী সঞ্চালক জয়ন্ত কুমাৰ ভূঞাই উৎসাহ মূলক বক্তব্য প্ৰদান কৰি কয় অংকিতাই যি খিতাপ অৰ্জন কৰি আনিলে সেয়া সচাঁকৈয়ে গৌৰৱৰ বিষয়। তাৰোপৰি বেংগলৰ বুদ্ধিদীপ্ত সমাজে বেংগল কুইন হিচাপে যি গৰাকীক নিৰ্বাচন কৰিলে সেই গৰাকী আমাৰ পৰিয়ালৰে হোৱাত আমি বেছিকৈ গৌৰৱ অনুভব কৰিছো বুলি মন্তব্য কৰে। মৰিগাঁও জিলাৰ ধুমকোৱা সমবায় সমিতিৰ সচিব মানিক দত্তৰ কণ্যা সদ্য বেংগল কুইনৰ খিতাপ অৰ্জন কৰা অংকিতা দত্তয়ো সম্বৰ্দ্ধনা গ্ৰহণ কৰি অভিভূত হৈ পৰা বুলি মন্তব্য কৰে।

তেওঁ অসমবাসী ৰাইজৰ লগতে পৰিয়াল,বন্ধু, বান্ধৱী আৰু মাক-দেউতাকৰ আৰ্শীৱাদৰ ফলতেই এই খিতাপ অৰ্জন কৰিবলৈ সক্ষম হোৱা বুলি মন্তব্য কৰে। আনহাতে উত্তৰ-পূৰ্বাঞ্চলৰ ভিতৰত এক মাত্ৰ প্ৰতিনিধি হিচাপে অংশ গ্ৰহণ কৰি এই খিতাপ অৰ্জন কৰাত নিজকে বহু সুখী বুলিও ব্যক্ত কৰে। মৰিগাঁও সমবায় সমূহৰ সন্থাৰ সম্পাদক দিলীপ ৰাজকুমাৰে আঁত ধৰা সভাখনত বঘৰা সমবায় সমিতিৰ সভাপতি খগেন বৰদলৈ,বৰঙাবাৰী সমবায় সমিতিৰ সভাপতি ইন্দেশ্বৰ বৰাকে আদি কৰি জিলাখনৰ সমবায় সমিতি সমূহৰ সভাপতি,সম্পাদক সমূহৰ লগতে যোগান বিভাগৰ বিষয়া কৰ্মচাৰী সকলেও আজিৰ সভা খনত অংশ গ্ৰহণ কৰে।