জামুগুৰিহাটত দুৰ্গা প্ৰতিমা নিৰ্মাণেৰে চমক দিছে অসমীয়া মহিলাই

জামুগুৰিহাটৰ পৰা চন্দন শৰ্মাৰ প্ৰতিবেদন:

শোণিতপুৰ জিলাৰ জামুগুৰিহাটত দুৰ্গা পূজাৰ প্ৰতিমা নিৰ্মাণেৰে চমক সৃষ্টি কৰিছে অসমীয়া মহিলাই ৷ ১০ গৰাকীকৈ অসমীয়া মহিলাই নিৰ্মাণ কৰা প্ৰতিমাৰ জৰিয়তে জিলাখনৰ বিভিন্ন প্ৰান্তৰ অৰ্ধশতাধিক দুৰ্গা পূজা আৰম্ভ কৰিব বুলি জানিবলৈ দিয়ে প্ৰতিমা নিৰ্মাণত ব্যস্ত মহিলাসকলে ৷ ঘৰৰ সাংসাৰিক ব্যস্ততাৰ মাজতে চেঁচাসত্ৰ গাঁৱৰ এই দহ গৰাকী মহিলাই প্ৰতিমা নিৰ্মাণৰ জৰিয়তে অঞ্চলটোৰ লগতে সমগ্ৰ জিলাখনতে চমক সৃষ্টি কৰা বুলি বিভিন্নজনে মন্তব্য কৰিছে ৷ গ্ৰামাঞ্চলৰ মহিলাসকলৰ বাবে অনুপ্ৰেৰণাৰ উৎস হৈ পৰা এই মহিলা মৃৎ শিল্পৰ উদ্যোগটোৰ জৰিয়তে বহুকেইটা পৰিয়াল আৰ্থিকভাৱে স্বাৱলম্বী হৈ উঠা বুলিও মন্তব্য কৰে উদ্যোগটোক নেতৃত্ব দিয়া ববী দাস নামৰ মহিলাগৰাকীয়ে ৷