শিৱসাগৰত উপায়ুক্তই কৰিলে মিনি মাৰাথনৰ শুভাৰম্ভ

শিৱসাগৰৰ  পৰা কল্যাণজ্যোতি বুঢ়াগোহাঁই

অসম আৰক্ষী দিৱস উপলক্ষে শিৱসাগৰ জিলা আৰক্ষী বিভাগে আয়োজন কৰা এক মিনি মাৰাথনৰ দেওবাৰে আনুষ্ঠানিকভাৱে শুভাৰম্ভ কৰে জিলাখনৰ উপায়ুক্ত ডাঃ এম এছ লক্ষ্মী প্ৰিয়াই।
আৰক্ষী অধীক্ষক অমিতাভ সিনহাৰ উপস্থিতিত জয়সাগৰ পুখুৰী পাৰৰ পৰা আৰম্ভ হোৱা এই মিনি মাৰাথনত   আৰক্ষী বিষয়া-জোৱানৰ লগতে জিলা প্ৰশাসনৰ বিষয়া-কৰ্মচাৰী, বিভিন্ন চৰকাৰী বিভাগৰ বিষয়ববীয়া, ছাত্ৰ-ছাত্ৰী আৰু স্থানীয় ৰাইজে অংশগ্ৰহণ কৰে।
উপায়ুক্ত গৰাকীয়ে এনেধৰণৰ কাৰ্যসূচী আয়োজনে ৰাইজৰ মাজত সুস্বাস্থ্যৰ গুৰুত্ব সম্পৰ্কে সচেতনতা বৃদ্ধি কৰিব বুলি আশা প্ৰকাশ কৰে। খেলুৱৈ সকলৰ লগতে সাধাৰণ ৰাইজেও স্বাস্থ্য সুস্থ আৰু সবল ৰখাৰ ক্ষেত্ৰত গুৰুত্ব প্ৰদান কৰিব লাগে বুলি তেওঁ মত প্ৰকাশ কৰে।
উপায়ুক্ত গৰাকীয়ে জিলাখনত মাহটোজোৰা চলি থকা পোষণ অভিযানৰ কথা উল্লেখ কৰি সকলো অংশগ্ৰহণকাৰীক পুষ্টিৰ প্ৰয়োজনীয়তা সম্পৰ্কে ৰাইজৰ মাজত সচেতনতা বৃদ্ধিৰ বাবে অগ্ৰণী ভূমিকা গ্ৰহণ কৰিবলৈ আহ্বান জনায়। পুষ্টিহীনতা আৰু ইয়াৰ কুপ্ৰভাৱৰ পৰা জিলাখনক মুক্ত কৰাৰ ক্ষেত্ৰত সকলোৱে সমূহীয়া দায়িত্ব পালন কৰিব লাগিব বুলি উপায়ুক্ত গৰাকীয়ে দোহাৰে।
অনুষ্ঠানত অতিৰিক্ত আৰক্ষী অধীক্ষক নবীন সিং, জিলা সমাজ কল্যাণ বিষয়া দীপালি দেৱী, জিলা ক্রীড়া বিষয়া সঞ্জয় উপাধ্যায় আৰু উপ আৰক্ষী অধীক্ষক শুভলক্ষ্মী দত্ত উপস্থিত থাকে বুলি জিলা তথ্য আৰু জনসংযোগ বিষয়াই জানিবলৈ দিছে।