জামুগুৰিহাটত চাৰি বিশিষ্ট ব্যক্তিক ৰাজহুৱা সম্বৰ্ধনা প্ৰদান

জামুগুৰিহাটৰ পৰা চন্দন শৰ্মাৰ প্ৰতিবেদন :

শোণিতপুৰ জিলাৰ জামুগুৰিহাটত শলগুৰিবাসী ৰাইজৰ উদ্যোগত শলগুৰি বাটচ'ৰা নামঘৰ প্ৰাঙ্গনত কালি এখন ৰাজহুৱা সম্বৰ্ধনা সভা সম্পন্ন হয় । উক্ত সম্বৰ্ধনা সভাত জামুগুৰিহাটৰ চাৰিজন বিশিষ্ট ব্যক্তি ক্ৰমে ২০১৯ বৰ্ষৰ শোণিত কোঁৱৰ গজেন বৰুৱা বঁটা প্ৰাপক তথা বিশিষ্ট চিত্ৰ-নৃত্য শিল্পী, বৰ নটুৱা, অভিনেতাৰ লগতে বাৰেচহৰীয়া ভাওনাক আধুনিক ৰূপ দিওতা ভবেন বৰা, ২০১৯ বৰ্ষৰ পেঞ্চন প্ৰাপক গজেন শইকীয়া আৰু চক্ৰপাণি শৰ্মা আৰু গুৱাহাটী বিশ্ববিদ্যালয়ৰ স্নাতক চুড়ান্ত পৰীক্ষাত সংগীত নৃত্য শাখাৰ "সত্ৰীয়া নৃত্য বিভাগ"ত প্ৰথম শ্ৰেণীৰ প্ৰথম হিচাপে নিৰ্বাচিত হোৱা মিমন মহন্তক সম্বৰ্ধনা জ্ঞাপন কৰা হয় ।

সম্বৰ্ধনা অনুষ্ঠানৰ পিছত বিশিষ্ট ব্যক্তিসকলে নিজৰ নিজৰ প্ৰতিভাৰ সন্দৰ্ভত বিশেষ আলোকপাত কৰাৰ লগতে নৱপ্ৰজন্মকো সঠিক দিশত আগবাঢ়িবৰ বাবে পৰামৰ্শ প্ৰদান কৰে। শেষত সম্বৰ্ধনা গ্ৰহণ কৰা বিশিষ্ট ব্যক্তিসকলৰ দীৰ্ঘায়ু কামনা কৰাৰ লগতে  উদ্যোক্তাসকলক এনে সুন্দৰ অনুষ্ঠান আয়োজন কৰাৰ বাবে সমগ্ৰ অঞ্চলবাসীয়ে ভূয়সী প্ৰশংসা কৰে ।