বনভাগ কনিষ্ঠ মহাবিদ্যালয়ৰ নৱাগত আদৰণী সভা সম্পন্ন

বাহাৰঘাটৰ পৰা নৰেন শৰ্মা

ঘগ্ৰাপাৰ অঞ্চলৰ বনভাগ কনিষ্ঠ মহাবিদ্যালয়ৰ দেওবাৰে নৱাগত আদৰণী সভা আৰু শৈক্ষিক বঁটা প্ৰদান  অনুষ্ঠান অনুষ্ঠিত হৈ যায়। আজি পুৱা মহাবিদ্যালয়ৰ  অধ্যক্ষ যোগেন্দ্ৰ কলিতাই পতাকা উত্তোলন কৰাৰ পিছতে শ্বহীদ বেদীত বন্তি প্ৰজলন কৰে নলবাৰী জিলা উন্নতি সভাৰ সাধাৰণ সম্পাদক ৰাতুল চন্দ্ৰ ডেকাই। শ্বহীদ বেদীত মাল্যাৰ্পণ  কৰে ছাত্ৰ একতা সভাৰ সভাপতি টিকেন বৰ্মনে । দিনৰ এঘাৰ বজাত  মহাবিদ্যালয়ৰ প্ৰবক্তা প্ৰাণজিত বুজৰবৰুৱাই আঁত ধৰা,  মহাবিদ্যালয়ৰ পৰিচালনা আৰু উন্নয়ন সমিতিৰ সভাপতি অচ্যুত গোস্বামীৰ সভাপতিত্বত অনুষ্ঠিত হোৱা  আৰু অধ্যক্ষ যোগেন্দ্ৰ কলিতাই আদৰণি ভাষণ দিয়া  সভাখনত বিশিষ্ট অতিথিৰ বক্তব্য প্ৰদান কৰে ধমধমা কনিষ্ঠ মহাবিদ্যালয়ৰ অধ্যক্ষ কুমুদ গোস্বামীয়ে । উক্ত সভাতে ২০১৯ চনৰ উচ্চতৰ মাধ্যমিক চূড়ান্ত পৰীক্ষাত মহাবিদ্যালয়খনৰ পৰা সৰ্বোচ্চ নম্বৰ লাভ কৰা ছাত্ৰী পিংকি বৰ্মনক  এইবেলি মহাবিদ্যালয়ৰ প্ৰতিষ্ঠাপক সভাপতি উত্তম চন্দ্ৰ ডেকা সোঁৱৰণী 'শৈক্ষিক বঁটা'প্ৰদান কৰা হয়। প্ৰতিবছৰে প্ৰদান কৰি অহা উত্তম চন্দ্ৰ ডেকা সোঁৱৰণী শৈক্ষিক বঁটা লাভ কৰা কৃতী শিক্ষাৰ্থীক মানপত্ৰ, ফুলাম গামোচা , ফুলাম জাপি, কলম আৰু কিতাপৰ টোপোলাৰে উষ্ম সম্বৰ্ধনা জনোৱা হয়। প্ৰাক্তন ছাত্ৰনেতা ,সাংবাদিক প্ৰয়াত উত্তম চন্দ্ৰ ডেকাৰ নাতি ৰাতুল চন্দ্ৰ ডেকাই আঁত ধৰা আজিৰ বঁটা প্ৰদান অনুষ্ঠানটোত  মহাবিদ্যালয়ৰ সৰ্বোচ্চ নম্বৰ লাভ কৰা পিংকি বর্মনক উক্ত বঁটা প্ৰদান কৰে মহাবিদ্যালয়খনৰ অধ্যক্ষ যোগেন্দ্ৰ কলিতা আৰু ধমধমা মহাবিদ্যালয়ৰ অধ্যক্ষ কুমুদ গোস্বামীয়ে।