পশ্চিম বড়িগোগ আঞ্চলিক ছাত্ৰ সন্থাৰ কৃতী শিক্ষাৰ্থীক বিশেষ অভিনন্দন 

বাহাৰঘাটৰ পৰা নৰেন শৰ্মা

 কামৰূপ জিলাৰ অন্তৰ্গত পশ্চিম বড়িগোগ আঞ্চলিক ছাত্ৰ সন্থাই আজি সদৌ অসম ছাত্ৰ সন্থাৰ শিক্ষা নীতিৰ আধাৰত অঞ্চলৰ হাইস্কুল আৰু উচ্চতৰ মাধ্যমিক চূড়ান্ত পৰীক্ষাত সুখ্যাতিৰে উত্তীৰ্ণ হোৱা শিক্ষাৰ্থীসকলক বিশেষ অভিনন্দন জনায়।তদুপলক্ষে শনিবাৰে দিনৰ ভাগত পশ্চিম বড়িগোগ আঞ্চলিক জুনিয়ৰ কলেজ প্ৰাংগনত আঞ্চলিক 'আছু'ৰ সভাপতি বিজিত কলিতাৰ সভাপতিত্বত অনুষ্ঠিত সভাখন উদ্বোধন কৰে আছুৰ তথ্য আৰু কাৰ্য্যালয় সম্পাদক ধৰ্মেশ্বৰ দাসে।ভাষণ প্ৰসংগত দাসে কয় যে বৰ্তমান চৰকাৰী শিক্ষা ব্যৱস্থাৰ আমূল পৰিৱৰ্তনৰ দৰকাৰ আছে৷নহ'লে এফালৰ পৰা চৰকাৰী শিক্ষানুষ্ঠানৰ শ্মশানযাত্ৰা আৰম্ভ হ'ব৷ভাষণত তেওঁ কয় যে এসময়ত চৰকাৰে ঠিকাভিত্তিত নিযুক্তি দিয়া শিক্ষকসকলৰ চাকৰি নিয়মীয়া কৰি চৰকাৰে মানৱতাৰ নিদৰ্শন দেখুৱাওক৷এইসকল শিক্ষকে এটা সময়ত শিক্ষকৰ অভাৱ পূৰণ কৰিছিল৷ সভাত আছুৰ সহকাৰী সাধাৰণ সম্পাদক প্ৰকাশ দাস বিশিষ্ট অতিথি হিচাপে উপস্থিত থাকি কয় যে বৰ্তমান ছাত্ৰ-ছাত্ৰীসকল আদৰ্শৱান হোৱাৰ প্ৰয়োজন৷নহ'লে অসমৰ জাতীয় অস্তিত্বৰ প্ৰতি ভাবুকি আহি পৰিব৷ সভাত পশ্চিম বড়িগোগ আঞ্চলিক কনিষ্ঠ মহাবিদ্যালয়ৰ ভাৰপ্ৰাপ্ত অধ্যক্ষ তৰু ভড়ালী,কামৰূপ জিলা আছুৰ সম্পাদক হেমন্ত দাস,ৰঙিয়া মহকুমা আছুৰ ভাৰপ্ৰাপ্ত সভাপতি সোনজ্যোতি বৰুৱা,কামৰূপ জিলা সাংবাদিক সন্থাৰ সম্পাদক তৰনী চৰন কলিতা,সাংবাদিক নৰেন শৰ্মা আদিকৰি কেইবাজনো বিশিষ্ট লোক অতিথি হিচাপে উপস্থিত থাকে৷আনহাতে অনুস্থানত কণ্ঠশিল্পী নেকিবে গীত-মাত পৰিৱেশন কৰে৷ আঁত ধৰে ৰঙিয়া মহকুমা ছাত্ৰ সন্থাৰ সম্পাদক ভৱজ্যোতি ডেকাই।সভাৰ উদ্দেশ্য ব্যাখ্যা কৰে প্ৰাক্তন সম্পাদক কৃষ্ণ কলিতাই৷ইয়াৰ আগতে পুৱাৰ ভাগত আছুৰ পতাকা উত্তোলন,শ্বহীদ তৰ্পণ,বৃক্ষৰোপন কাৰ্য্যসূচী ৰূপায়ণ কৰাৰ লগতে সন্ধিয়া বন্তি প্ৰজ্জ্বলন কৰে৷