বইটামাৰীৰ ইন্দিৰা গান্ধী মহাবিদ্যালয়ৰ নৱাগত আদৰণি সভা সম্পন্ন 

বইটামাৰীৰ প্ৰতিবেদক

বঙাইগাঁও জিলাৰ বইটামাৰীস্থিত ইন্দিৰা গান্ধী মহাবিদ্যালয়ৰ নৱাগত আদৰণি সভাখন শুকুৰবাৰে অনুষ্ঠিত হয়।এই উপলক্ষে দিনৰ ১১ বজাত মহাবিদ্যালয়খনৰ অসমীয়া বিভাগৰ প্ৰৱক্তা সোণামনি বৰ্মনৰ সভাপতিত্বত অনুষ্ঠিত সভাৰ আৰম্ভণিতে পৰম্পৰাগত প্ৰথাৰে নৱাগতসকলক অনুষ্ঠানলৈ আদৰি অনা হয়। ইয়াৰ পিছতে মহাবিদ্যালয়খনৰ ছাত্ৰীসকলে সমবেত সংগীত পৰিৱেশন কৰে। সভাত বইটামাৰী উচ্চতৰ মাধ্যমিক বিদ্যালয়ৰ অৱসৰী শিক্ষক কমল কিশোৰ অধিকাৰী, বইটামাৰীৰ ইন্দিৰা গান্ধী মহাবিদ্যালয়ৰ অন্যতম প্ৰতিষ্ঠাপক তথা সমাজকৰ্মী নগেন ৰায় আৰু বইটামাৰী উচ্চতৰ মাধ্যমিক বিদ্যালয়ৰ সহকাৰী শিক্ষক শিৱানন্দ নাথে মুখ্য অতিথি হিচাপে উপস্থিত থাকি নৱাগত শিক্ষাৰ্থীসকলক উদ্দেশ্যি মূল্যবান ভাষণ আগবঢ়ায়। মহাবিদ্যালয়খনৰ অধ্যক্ষ নাৰায়ণ মেধি সমন্বিতে মহাবিদ্যালয়খনৰ প্ৰবক্তা, কৰ্মচাৰীবৃন্দ, ছাত্র একতা সভাৰ বিষয়ববীয়াসকল উপস্থিত থকা সভাত মহাবিদ্যালয়খনৰ প্ৰবক্তা মোজাম্মিল হক আৰু প্ৰাক্তন ছাত্র ধনঞ্জয় গোস্বামীয়েও বক্তব্য প্ৰদান কৰে ৷ সভাত কেইবাগৰাকী নৱাগত ছাত্র-ছাত্ৰীয়েও তেওঁলোকৰ নিজৰ মনোভাৱ ব্যক্ত কৰে। ইপিনে একেখন সভাতে বিগত বৰ্ষত স্নাতক চূড়ান্ত পৰীক্ষাত সৰ্বোচ্চ নম্বৰপ্ৰাপ্ত আবিদা চুলতানা নামৰ ছাত্ৰীগৰাকীক মহাবিদ্যালয়খনৰ উচ্চ বৰ্গৰ সহায়ক লক্ষেশ্বৰ নাথে বঁটা প্ৰদান কৰাৰ লগতে সম্বৰ্ধনা জনায় ৷ উল্লেখ্য যে মহাবিদ্যালয়খনৰ উচ্চ বৰ্গৰ সহায়ক লক্ষেশ্বৰ নাথে প্ৰতি বছৰে নিজা উদ্যোগত মহাবিদ্যালয়খনৰ স্নাতক চূড়ান্ত পৰীক্ষাত সৰ্বোচ্চ নম্বৰ পোৱা শিক্ষাৰ্থীজনক বঁটা প্ৰদান কৰাৰ লগতে সম্বৰ্ধনা জ্ঞাপন কৰি আহিছে ৷ সভাৰ অন্তত সাংস্কৃতিক কাৰ্যসূচী অনুষ্ঠিত হয় ।