শিক্ষক দিৱসৰ পৰাই ব্যতিক্ৰমী কাৰ্যসূচী: পশ্চিম বড়িগোগৰ যুৱকৰ গছপুলি ৰোপণ, বিতৰণ

বাহাৰঘাটৰ পৰা নৰেন শৰ্মা

শিক্ষক দিৱসৰ পৰাই কামৰূপ জিলাৰ হাজো বিধান সভা সমষ্টিৰ পশ্চিম বড়িগোগ মৌজাৰ অন্তৰ্গত বৰপূল্লাৰ যুৱক নিবাৰণ লহকৰে গছপুলি বিতৰণ আৰু ঠাই বিশেষে ৰোপণ কৰি এক ব্যতিক্ৰমী কাৰ্যসূচী ৰূপায়ণ কৰাৰ আঁচনি লৈছে৷ উল্লেখযোগ্য যে য়ুৱকজনে তেওঁৰ লগত সমগ্ৰ হাজো অঞ্চলৰ প্ৰায় একশ গৰাকীতকৈ অধিক যুৱক-যুৱতিৰ সহযোগত শিক্ষক দিৱসৰ পৰাই উক্ত কাৰ্যসূচী আৰম্ভ কৰিছে৷ শিক্ষক দিৱসৰ দিনাই তেওঁৰ জন্ম গাওঁ বৰপূল্লাৰ লহকৰ চুবুৰিৰ শংকৰদেৱে নামঘৰত এটি মূল্যবান গছপুলি ৰোপণ কৰি কাৰ্যসূচীৰ শুভাৰম্ভ কৰে৷ ইয়াৰ পিচতে যুৱকজনে স্থানীয় পশ্চিম বড়িগোগ আঞ্চলিক কনিষ্ঠ মহাবিদ্যালয়ৰ অৱসৰপ্ৰাপ্ত অধ্যক্ষ ৰামদত্ত লহকৰ আৰু অঞ্চলৰ কেইবাগৰাকীও অৱসৰপ্ৰাপ্ত শিক্ষকক একোটিকৈ গছপুলিৰে শিক্ষক দিৱসৰ শুভেচ্ছা জনায়৷ উল্লেখযোগ্য যে সেইদিনাখন তেওঁ সমগ্ৰ হাজো সমষ্টিৰ ভিতৰত কেইবাখনো প্ৰতিষ্ঠানৰ প্ৰধানৰ লগতে শিক্ষানুষ্ঠান-প্ৰতিষ্ঠানত গছপুলি বিতৰণ আৰু ৰোপণ কৰে৷ যুৱকজনৰ প্ৰচেষ্টাত এনেদৰে ৰূপায়িত সেউজী ধৰনী, সেউজী অসম, সেউজী হাজো শীৰ্ষক কাৰ্যসূচীক ৰাইজে আদৰি লৈছে বুলি লহকৰে সংবাদ মাধ্যমৰ আগত ব্যক্ত কৰিছে৷