অসম কবি সন্মিলনৰ কেন্দ্ৰীয় প্ৰতিষ্ঠা দিৱসৰ আয়োজন

নগাঁৱৰ পৰা ঋতু পৰ্ণ শৰ্মাৰ প্রতিবেদন : 

১৯৮৭ চনত নামৰূপত প্ৰতিষ্ঠা লাভ কৰা সদৌ অসম কবি সন্মিলনৰ তেত্ৰিশতম প্ৰতিষ্ঠা দিৱসটি অহা ৬ ছেপ্তেম্বৰত নগাঁও জিলা কবি সন্মিলন আৰু শাখা সমূহৰ উদ্যোগত আয়োজন কৰা হৈছে । নগাঁও শ্বহীদ ভৱনত দিনজোৰা কাৰ্যসূচীৰে অনুষ্ঠিত হ'বলগীয়া প্ৰতিষ্ঠা দিৱসত অসম সাহিত্য সভাৰ সভাপতি পৰমানন্দ ৰাজবংশী মুখ্য অতিথি, বিশিষ্ট সমালোচক প্ৰভাত বৰা সন্মানীয় অতিথি, সদৌ অসম কবি সন্মিলনৰ সভাপতি নীলকান্ত শইকীয়া, প্ৰধান সম্পাদক উজ্জ্বল পাওগাম, সদৌ অসম কবি সন্মিলনৰ প্ৰাক্তন সভাপতি প্ৰেম গগৈ, জুলীয়ানা বেগম, আনিছ উজ জামান, ডঃ মাণিক শইকীয়া, প্ৰাক্তন প্ৰধান সম্পাদক আনন্দ চন্দ্ৰ দত্ত, দেৱজিত দত্ত, হেমনাৰায়ণ দত্ত, পৰাগজ্যোতি মহন্ত, হৰেণ গগৈ বিশিষ্ট অতিথিৰূপে উপস্থিত থাকিব । সভাখনৰ আৰম্ভণিতে পুৱা  ৯ বজাত পতাকা উত্তোলন কৰিব নীলকান্ত শইকীয়াই । ইয়াৰ পাছতে ক্ৰমান্বয়ে ৯.৩০ বজাত নগাঁও জিলা কবি সন্মিলনৰ সভাপতি প্ৰদীপ শইকীয়াৰ দ্বাৰা স্মৃতি তৰ্পণ,  ৯.৪০ বজাত দিলীপ কুমাৰ নাথ, যোগেন্দ্ৰ নাথ শইকীয়া, দীপজ্যোতি বৰা, প্ৰদীপ কুমাৰ শইকীয়া, বিমান হাজৰিকা, কৰবী লিগিৰা, পৰাণ চন্দ্ৰ দাস আৰু গুণ কাকতিৰ দ্বাৰা গছপুলি ৰোপণ কাৰ্যসূচী সমাপন কৰা হ'ব । পুৱা ১০.৩০ বজাত কবিতাৰ সমাহাৰ শীৰ্ষক স্থানীয় কবিৰ কবিতা পাঠৰ অনুষ্ঠান সঞ্চালনা কৰিব মৰিগাঁও জিলা কবি সন্মিলনৰ সভাপতি অশোক ডেকাই আৰু উদ্বোধন কৰিব সদৌ অসম কবি সন্মিলনৰ ৱেবচাইট প্ৰস্তুতি সমিতিৰ সভাপতি মহেন্দ্ৰ নাথ হাজৰিকাই । বিয়লি ১ বজাত আৰম্ভ হ'বলগা মুকলি সভাত আদৰণি ভাষণ প্ৰদান কৰিব শোণিতপুৰ জিলা কবি সন্মিলনৰ সভাপতি ডাঃ হৰেণ শইকীয়াই । ইয়াৰ পাছতেই আমন্ত্ৰিত কবিৰ কবিতা পাঠৰ অনুষ্ঠান সঞ্চালনা কৰিব হোজাই জিলা কবি সন্মিলনৰ সভাপতি ডঃ হাচিনুছ চুলতানে । উল্লেখ্য যে, সভাৰ মুখ্য অতিথি পৰমানন্দ ৰাজবংশীয়ে  ধিং আঞ্চলিক কবি সন্মিলনৰ সভাপতি দিলীপ কুমাৰ নাথৰ "শিক্ষাৰ প্ৰয়োজনীয়তা" আৰু "দিগন্তৰ ডিঙা" শীৰ্ষক দুখনকৈ গ্ৰন্থ উন্মোচন কৰিবলগা উক্ত সভাতেই সদৌ অসম কবি সন্মিলনৰ প্ৰতিষ্ঠাপক সভ্য মৰিগাঁও জিলাৰ জয়ৰাম নাথকো সম্বৰ্ধনা জনোৱা হ'ব ।  অনুষ্ঠানৰ সমূহ কাৰ্যসূচীত সদৌ অসম কবি সন্মিলনৰ প্ৰচাৰ সম্পাদকদ্বয় ক্ৰমে অচ্যুত কুমাৰ বৰা আৰু মদাৰজ্যোতিয়ে সকলো কবি আৰু কাব্যানুৰাগী ৰাইজৰ উপস্থিতি কামনা কৰিছে ।