ৰাজ্যসভাত উত্থাপন নহ'ল নাগৰিকত্ব সংশোধনী বিধেয়ক : বঙাইগাঁৱত আগতীয়া হোলী

জাতিধ্বংসী নাগৰিকত্ব সংশোধনী বিধেয়ক, ২০১৬ ৰাজ্যসভাত উত্থাপন নোহোৱাৰ পিচতে ৰাজ্যজুৰি সৃষ্টি হোৱা আনন্দ-উল্লাস বঙাইগাঁৱতো পৰিলক্ষিত হৈছে৷ আজি বঙাইগাঁও চহৰৰ বৰপাৰা ৰাজহুৱা খেলপথাৰত বহু বিতৰ্কিত বিধেয়কখন ৰাজ্যসভাত উত্থাপন নোহোৱাত বঙাইগাঁও জিলা কৃষক মুক্তি সংগ্ৰাম সমিতিৰ একাংশ কৰ্মীয়ে এজনে আনজনৰ গালে-মুখে আবিৰ সানি ৰং খেলি তথা ফটকা ফুটাই নাচি-বাগি বিহুগীত গাই আনন্দ প্ৰকাশ কৰে৷

লগতে মিঠাইও খুৱায়৷ ইপিনে আনন্দ উৎসৱত অংশ লোৱা জিলা কৃষক মুক্তি সংগ্ৰাম সমিতিৰ সম্পাদক নন্দন দেৱনাথে সংবাদ মাধ্যমৰ আগত কয় যে দীৰ্ঘদিন ধৰি নাগৰিকত্ব সংশোধনী বিধেয়কখনৰ বিৰুদ্ধে আমি সমগ্ৰ উত্তৰ-পূবৰ জনসাধাৰণে ঐক্যবদ্ধভাৱে তথা সকলো জাতীয় দল-সংগঠন, সকলো সৰু-বৰ ৰাজনৈতিক দলে মিলি তীব্ৰ গণতান্ত্ৰিক আন্দোলন গঢ়ি তুলিছো৷

প্ৰথমবাৰৰ বাবে ভাৰতৰ ইতিহাসত উত্তৰ-পূৰ্বাঞ্চলৰ মানুহ গৈ দিল্লীত ৰাজনৈতিক কৌশল কৰি সফল হব'লৈ সক্ষম হৈছে৷ যাৰবাবে কেন্দ্ৰৰ এনডিএ চৰকাৰে নাগৰিকত্ব সংশোধনী বিধেয়কখন ৰাজ্যসভাত উত্থাপন কৰিবলৈ পৰা নাই আৰু গৃহীত কৰিবলৈ পৰা নাই৷ নৰেন্দ্ৰ মোডী নেতৃত্বাধীন চৰকাৰখনে বিধেয়কখন উত্থাপন কৰি গৃহীত কৰাৰ বাবে শেষ পৰ্যন্ত নানা কূট-কৌশল অৱলম্বন কৰিছিল যদিও বিভিন্ন সৰু-বৰ ৰাজনৈতিক দলৰ বিৰোধিতাৰ কাৰণে গৃহীত কৰিব নোৱাৰিলে৷ সেয়ে এয়া সমগ্ৰ অসমবাসীৰ বাবে আনন্দৰ দিন, সমগ্ৰ অসমীয়া মানুহৰ এয়া এক জয়, সমগ্ৰ উত্তৰ-পূবৰ মানুহৰ জয়৷

কিন্তু এই মুহূৰ্তত আমি এটা কথা মনত ৰাখিব লাগিব যে ভৱিষ্যতে যাতে বিজেপি তথা এনডিএ দলে নাগৰিকত্ব সংশোধনী বিধেয়ক পুনৰ উত্থাপন কৰিব নোৱাৰে তাৰবাবে তেওঁলোকক আমি পৰাভূত কৰিব পাৰিব লাগিব৷ লগতে এতিয়া আমি সকলোৱে ঐক্যবদ্ধ হৈ যি বিদেশী সমস্যা আছে, হিন্দুৱে হওক বা মুছলমানেই হওক, সকলোকে খেদিবৰ কাৰণে আমি দাবী জনাব লাগে৷ আমি শুনিছো যে ৰহিংগীয়া ভাৰত তথা অসমত প্ৰৱেশ কৰিছে৷

গতিকে সেই ৰহিংগীয়াসকলক যাতে বিতাড়ন কৰিব পৰা যায়, বিদেশীসকলক যাতে খেদি পঠিয়াব পৰা যায়, তাৰ কাৰণে আমি ঐক্যবদ্ধভাৱে লাগিব লাগে আৰু অসমৰ উন্নয়নৰ কাৰণে লগিব লাগে বুলি কয়৷ লগতে এন আৰ চিৰ নামত যাতে কোনো বিদেশী সোমাব নোৱাৰে আৰু এন আৰ চিখন শুদ্ধ হয় তাৰবাবেও সকলোৱে চোকা নজৰ ৰাখিব লাগিব বুলি কয়৷