বাক্সাত ড্ৰাগছৰ ঘাটিত আৰক্ষীৰ অভিযান : লক্ষাধিক টকাৰ হেৰইনসহ দুজনক গ্ৰেপ্তাৰ

জালাহৰ পৰা গুঞ্জন দাস

সম্প্ৰতি বাক্সা জিলা ড্ৰাগছৰ ৰমৰমীয়া বেহাত পৰিণত হৈ পৰিছে। গুৱাহাটীৰ কটহবাৰীৰ পৰা হেৰইন ক্ৰয় কৰি বাক্সাত প্ৰতিদিনে চলাই আহিছে ড্ৰাগছৰ ৰমৰমীয়া ব্যৱসায়। অৱশেষত বাক্সা জিলাৰ শিমলা আৰক্ষীয়ে দুই লক্ষাধিক টকাৰ ড্ৰাগছসহ দুই যুৱকক গ্ৰেপ্তাৰ কৰিবলৈ সক্ষম হৈছে। বাক্সা জিলাৰ শিমলা আৰক্ষী থানাৰ ভাৰপ্ৰাপ্ত বিষয়া পৱন গায়নৰ নেতৃত্বত যোৱা আৰক্ষীৰ দল এটাই নিশা লক্ষ্মীবজাৰৰ দুৰ্গম অঞ্চলত অভিযান চলাই দুই লক্ষাধিক টকাৰ ড্ৰাগছসহ দৰং জিলাৰ ছিপাঝাৰৰ বাসিন্দা দুই যুৱক ক্ৰমে কৰিম আলী আৰু ৰহিম উদ্দিনক আটক কৰিবলৈ সক্ষম হয়৷ জিলাখনত ড্ৰাগছৰ অধিক প্ৰচলন হোৱাৰ ফলত যুৱপ্ৰজন্ম ধ্বংসৰ মুখে গতি কৰাটো নিশ্চিত হৈ পৰিছিল৷ সম্প্ৰতি ধৃত দুয়োকে অধিক তথ্যৰ বাবে শিমলা আৰক্ষীয়ে জেৰা অব্যাহত ৰাখিছে।