বঙাইগাঁৱৰ ৰাখালডুবিত ভয়ংকৰ পথ দুৰ্ঘটনা : বিপিএফ কৰ্মীসহ ২জন থিতাতে নিহত

বঙাইগাঁও সদৰ থানাৰ অন্তৰ্গত ৰাখালডুবিৰ নিকটৱৰ্তী ডাউকীঝাৰৰ ৰাষ্ট্ৰীয় ঘাইপথত আজি পুৱা সংঘটিত এক ভয়াৱহ পথ দুৰ্ঘটনাত এজন লোক থিতাতে নিহত হোৱাৰ লগতে আন এজনৰ চিকিৎসালয়লৈ নিয়াৰ পথত মৃত্যু হয়৷ আনহাতে, আহত হয় আন ছয়জনকৈ লোক৷ ঘটনা সন্দৰ্ভত জানিব পৰামতে, কোকৰাঝাৰত অনুষ্ঠিত বিপিএফৰ কেন্দ্ৰীয় অধিবেশনত যোগদান কৰিবলৈ বুলি বাক্সা জিলাৰ সদৰ মুছলপুৰৰ পৰা কোকৰাঝাৰ অভিমুখে গৈ থকা অৱস্থাত বিপিএফ কৰ্মীৰ এ এছ-২৮ ৬৩২৮ নম্বৰৰ বগা ৰঙৰ বলেৰ' বাহনখন আই নৈৰ দলং পাৰ কৰি অহাৰ পিচত ডাউকীঝাৰত ৰাষ্ট্ৰীয় ঘাইপথৰ সোঁফালে ৰখাই থোৱা ডব্লিউ বি-৩৯ ৭৯৮১ নম্বৰৰ গেছৰ চিলিণ্ডাৰ কঢ়িওৱা ট্ৰাকখনক পিছফালৰ পৰা তীব্ৰ জোৰে খুন্দা মাৰে৷

ফলত বলেৰ'খনত থকা আমিৰ আলী (৪০)ৰ থিতাতে মৃত্যু হয়৷ ইপিনে পথ দুৰ্ঘটনাৰ খবৰ পোৱাৰ পিচতে বঙাইগাঁও যান-বাহন আৰক্ষীৰ লোক দুৰ্ঘটনাস্থলীত উপস্থিত হয় আৰু নিহত লোকজনৰ মৃতদেহ উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰাৰ লগতে বাকী সাতজনকৈ আহতক বঙাইগাঁৱৰ ব্যক্তিগত খণ্ডৰ চিকিৎসালয় ল'ৱাৰ আছাম চিকিৎসালয়লৈ প্ৰেৰণ কৰে৷ অৱশ্যে ইয়াৰে ভিতৰত অতি সংকটজনক অৱস্থাত থকা ৰণ্টু কলিতা (২৭)ৰ চিকিৎসালয়লৈ নিয়াৰ পথত মৃত্যু হয়৷ মৃত ৰণ্টু কলিতা বলেৰ'খনৰ চালক আছিল বুলি আৰক্ষীয়ে জানিবলৈ দিছে৷

দুৰ্ঘটনাটোত সতীশ ৰঞ্জন চেত্ৰী (৪২), হেমন্ত ভৰালী (৪২), দেবেন্দ্ৰ বসুমতাৰী (৪৫), উত্তম দাস (৬৫), অনিল বসুমতাৰী (৪০) আৰু মুস্তাফা আলী (৪১) আহত হয়৷ নিহত লোক দুজনৰ মৃতদেহ বঙাইগাঁও অসামৰিক চিকিৎসালয়ত মৰণোত্তৰ পৰীক্ষা সম্পন্ন হোৱাৰ পিচত আৰক্ষীয়ে পৰিয়ালৰ লোকক গতাই দিয়ে৷ দুৰ্ঘটনাটোত বলেৰ'খন সম্পূৰ্ণ বিধ্বস্ত হৈ পৰে৷ আৰক্ষীয়ে বিধ্বস্ত বলেৰ'খন উদ্ধাৰ কৰি থানালৈ অনাৰ লগতে চিলিণ্ডাৰৰ ট্ৰাকখন জব্দ কৰে৷ আৰক্ষীয়ে ট্ৰাকখনৰ চালক পলাতক বুলি জানিবলৈ দিয়াৰ লগতে দুৰ্ঘটনাটো পুৱা ৯.৪০ বজাত সংঘটিত হয় বুলি জানিবলৈ দিয়ে৷