বঙাইগাঁৱত সদৌ অসম সুলভ মূল্যৰ ব্যৱসায়ী সন্থাৰ ৰূপালী জয়ন্তী বৰ্ষৰ আয়োজন

সদৌ অসম সুলভ মূল্যৰ ব্যৱসায়ী সন্থাৰ ৰূপালী জয়ন্তী বৰ্ষৰ অধিৱেশনখন অহা ২ আৰু ৩ ফেব্ৰুৱাৰীত দুদিনীয়া কাৰ্যসূচীৰে বঙাইগাঁও চহৰৰ বৰপাৰা ৰাজহুৱা খেলপথাৰত অনুষ্ঠিত হ'ব৷ বঙাইগাঁও জিলা সুলভ মূল্য ব্যৱসায়ী সন্থাৰ আতিথ্যত অনুষ্ঠিত হ'বলগীয়া ৰূপালী জয়ন্তী অধিৱেশনৰ কাৰ্যসূচী অনুসৰি প্ৰথম দিনা পুৱা পতাকা উত্তোলনেৰে কাৰ্যসূচীৰ শুভাৰম্ভ কৰিব অভ্যৰ্থনা সমিতিৰ সভাপতি দিপু চৌধুৰীয়ে ৷

ইয়াৰ পিচতে বন্তি প্ৰজ্বলন কৰিব সদৌ অসম সুলভ মূল্যৰ ব্যৱসায়ী সন্থাৰ উপ-সভাপতি লক্ষেশ্বৰ দাসে ৷ আবেলি অনুষ্ঠিত হ'ব কাৰ্যনিৰ্বাহক সভা ৷ সন্ধিয়া প্ৰতিনিধি শিবিৰ মুকলি কৰিব বঙাইগাঁও জিলাৰ সুলভ মূল্যৰ ব্যৱসায়ী সন্থাৰ উপদেষ্টা প্ৰমোদ ৰায়ে ৷ ইয়াৰ পিছতে প্ৰতিনিধি সভা অনুষ্ঠিত হ'ব ৷ এই কাৰ্যসূচীসমূহ বীৰঝৰা পাব্লিক লাইব্ৰেৰীত অনুষ্ঠিত হ'ব ৷ আনহাতে দ্বিতীয়দিনাৰ কাৰ্যসূচী অনুসৰি পুৱা বৰপাৰা ৰাজহুৱা খেলপথাৰত ছহিদ তৰ্পণ আৰু মাল্যাৰ্পণ কাৰ্যসূচী মুকলি কৰিব ছহিদ বাবুল কুমাৰ ব্ৰহ্মৰ সহধৰ্মিনী সবিতা ব্ৰহ্ম আৰু সদৌ ভাৰত সুলভ মূল্যৰ ব্যৱসায়ী ফেডাৰেচনৰ উপাধ্যক্ষ দেবেন বড়োৱে৷

এই কাৰ্যসূচীৰ পিছতে অনুষ্ঠিত হ'ব মুকলি সভা ৷ সদৌ অসম সুলভ মূল্যৰ ব্যৱসায়ী সন্থাৰ সভাপতি বিষ্ণু দাসৰ সভাপতিত্বত অনুষ্ঠিত হ'বলগীয়া মুকলি সভাত স্থানীয় বিধায়ক ফণীভূষণ চৌধুৰী আৰু সদৌ ভাৰত সুলভ মূল্যৰ ব্যৱসায়ী ফেডাৰেচনৰ সাধাৰণ সম্পাদক বিশ্বম্ভৰ বসুৱে মুখ্য অতিথি হিচাপে উপস্থিত থাকিব বুলি অভ্যৰ্থনা সমিতিৰ সভাপতি দিপু চৌধুৰী, কাৰ্যকৰী সভাপতি নিত্যানন্দ চক্ৰৱৰ্তী আৰু সাধাৰণ সম্পাদক নৃপেন দাসে জানিবলৈ দিছে৷