সোণাৰিৰ সূৰ্য বৰালৈ 'ভদ্ৰকৃষ্ণ গোস্বামী সোঁৱৰণী সাংবাদিকতা বঁটা'

সোণাৰিৰ পৰা ঘন বড়া
পৰিশ্ৰমী আৰু নিষ্ঠাবান সাংবাদিকক অনুপ্ৰেৰণা যোগোৱা আৰু ভৱিষ্যতৰ সফল সাংবাদিক গঢ়াৰ মানসেৰে তিনিচুকীয়া জিলাৰ সাংবাদিক সন্থাৰ প্ৰতিষ্ঠাপক সভাপতি ভদ্ৰকৃষ্ণ গোস্বামীৰ সোঁৱৰণত প্ৰথমবাৰৰ বাবে প্ৰৱৰ্তন কৰা "ভদ্ৰকৃষ্ণ গোস্বামী সোঁৱৰণী সাংবাদিকতা বঁটা" 'অসমীয়া প্ৰতিদিন' কাকতৰ সোণাৰিৰ সংবাদদাতা সূৰ্য বৰালৈ আগবঢ়াইছে।

এই বঁটা অহা ৩ ফেব্ৰুৱাৰীত মাৰ্ঘেৰিটাৰ উত্তৰ ৰংগমঞ্চত অনুষ্ঠিত হ'ব লগা তিনিচুকীয়া জিলা সাংবাদিক সন্থাৰ বিংশতম্ দ্বি-বাৰ্ষিক অধিৱেশনৰ মুকলি সভাত প্ৰদান কৰিব । উল্লেখযোগ্য যে ডিব্ৰুগড় বিশ্ববিদ্যালয়ৰ পৰা গণিতৰ স্নাতকোত্তৰ ডিগ্ৰীধাৰী সূৰ্য বৰাই ১৯৯৫ চনৰ পৰা 'দৈনিক অগ্ৰদূত' কাকত আৰু ২০০৫ চনৰ পৰা 'অসমীয়া প্ৰতিদিন' কাকতলৈ সোণাৰিৰ পৰা সংবাদ পৰিৱেশন কৰি আহিছে।

১৯৬৮ চনত সোণাৰিৰ ভজো ৰংচোৱাল গাঁৱত জন্ম গ্ৰহণ কৰিছিল সূৰ্য বৰাই। বৰ্তমান সোণাৰিৰ ১১নং ৱাৰ্ডৰ নিবাসী সূৰ্য বৰা প্ৰয়াত গুণ প্ৰসাদ বৰা আৰু তোষপ্ৰিয়া বৰাৰ সন্তান। চৰাইদেউৰ জিলাৰ অগ্ৰণী উমৈহতীয়া সাংবাদিক মঞ্চ 'চৰাইদেউ প্ৰেছ গীল্ড'ৰ সভাপতি সূৰ্য বৰা বিভিন্ন সামাজিক কৰ্ম,  অনুষ্ঠান-প্ৰতিষ্ঠান আৰু কৃষি কৰ্মৰ লগত জড়িত।