মৰিগাঁও নগৰত ভয়াৱহ অগ্নিকাণ্ড

মৰিগাঁৱৰ পৰা জিতুমনি নাথ
মৰিগাঁও নগৰৰ ৪নং ৱাৰ্ডৰ লঠাবৰিত কালি সন্ধিয়া সংঘটিত হোৱা এক ভয়াৱহ অগ্নিকাণ্ডত দুটা পৰিয়ালৰ গৃহ সম্পুৰ্ণৰূপে ভস্মীভূত হয়। সন্ধিয়া প্ৰায় ৭.৩০মান বজাত সংঘটিত অগ্নিকাণ্ডত বিষ্ণু বৰদলৈ আৰু ধনঞ্জয় বৰদলৈ নামৰ পৰিয়াল দুটাৰ গৃহ ভস্মীভূত হোৱা বুলি জানিব পৰা গৈছে। স্থানীয় ৰাইজে জানিবলৈ দিয়া মতে বিষ্ণু বৰদলৈৰ ঘৰৰ লগতে থকা দোকানখন বন্ধ কৰি ঘৰত ভাত খাই শুবলৈ ওলাওঁতেই হঠাতে দপ্‌দপাই জ্বলি উঠে দোকানখন ।

এই জুই বিয়পি বিষ্ণু বৰদলৈৰ গৃহটো ভস্মীভূত হোৱাৰ লগতে ওচৰতে থকা ধনঞ্জয় বৰদলৈৰ গৃহটোও জুইৰ লেলিহান শিখাই ভস্মীভূত কৰে । বহু লক্ষাধিক টকাৰ সা-সম্পত্তি ধ্বংস হোৱা ২টা পৰিয়ালৰ গৃহত সংঘটিত অগ্নি নিৰ্বাপিত কৰিবলৈ প্ৰায় আধা ঘণ্টা সময় পলমকৈহে মৰিগাঁও অগ্নিনিৰ্বাপক বাহিনীৰ লোকসকল উপস্থিত হয় বুলি অভিযোগ কৰিছে স্থানীয় ৰাইজে । অগ্নিনিৰ্বাপক বাহিনীৰ ৩খনকৈ গাড়ীয়ে অগ্নি নিৰ্বাপণ কৰে যদিও ইতিমধ্যে দুই পৰিয়ালৰ গৃহ সম্পূৰ্ণৰূপে ভস্মীভূত হয় ।