বঙাইগাঁৱত ৪ ডিচেম্বৰত কামতা সাহিত্যৰত্ন অম্বিকাচৰণ চৌধুৰীৰ সপ্তম বাৰ্ষিক স্মৃতি দিৱসৰ আয়োজন 

বঙাইগাঁও জিলা সাহিত্য সভাৰ উদ্যোগত আৰু নৰ্থ বঙাইগাঁও শাখা সাহিত্য সভাৰ সহযোগত অহা ৪ ডিচেম্বৰত নৰ্থ বঙাইগাঁৱৰ অসম কৃষ্টি বিকাশ সংঘত কামতা সাহিত্যৰত্ন অম্বিকাচৰণ চৌধুৰীৰ সপ্তম বাৰ্ষিক স্মৃতি দিৱসৰ আয়োজন কৰা হৈছে । স্মৃতি দিৱসৰ কাৰ্যসূচী অনুসৰি উক্ত দিনা পুৱা ৯ বজাত অসম সাহিত্য সভাৰ পতাকা উত্তোলন কৰি অনুষ্ঠানৰ শুভাৰম্ভ কৰিব নৰ্থ বঙাইগাঁও শাখা সাহিত্য সভাৰ সভাপতি নীৰেন চন্দ্র দাসে ৷

আনহাতে আবেলি ২ বজাত অম্বিকাচৰণ চৌধুৰীৰ প্ৰতিচ্ছবিত বন্তি প্ৰজ্বলন আৰু মাল্যাৰ্পন কৰিব ক্ৰমে অসম সাহিত্য সভাৰ প্ৰজাতীয় মৈত্রী বন্ধন উপ সমিতিৰ আহ্বায়ক অমৰেন্দ্ৰ বৰুৱা আৰু অসম সাহিত্য সভাৰ কেন্দ্ৰীয় কাৰ্যনিৰ্বাহক সদস্য ডঃ হিতেশ দাসে । আবেলি ৩ বজাত অনুষ্ঠিত হ'ব স্মৃতিচাৰণ আৰু গ্ৰন্থ উন্মোচনী সভা ।

বঙাইগাঁও জিলা সাহিত্য সভাৰ সভাপতি অজিত কুমাৰ দাসৰ সভাপতিত্বত অনুষ্ঠিত হ'বলগীয়া সভাত বঙাইগাঁও জিলা সাহিত্য সভাৰ প্ৰাক্তন সভাপতি কাব্যনিধি ডঃ মুকুন্দ শৰ্মাই মুখ্য অতিথি আৰু অসমীয়া প্ৰতিদিন কাকতৰ বঙাইগাঁও সংস্কৰণৰ আৱাসিক সম্পাদক হেমন্ত কুমাৰ শৰ্মাই বিশিষ্ট অতিথি হিচাপে অংশগ্ৰহণ কৰিব ৷