নগাঁৱৰ বেবেজীয়াত যুৱকৰ মৃতদেহ উদ্ধাৰ 

নগাঁও জিলাৰ বেবেজীয়াত আজি পুৱা এজন যুৱকৰ মৃতদেহ উদ্ধাৰ হোৱা ঘটনাক কেন্দ্ৰ কৰি তীব্ৰ চাঞ্চল্যৰ সৃষ্টি হৈছে । বৃহস্পতিবাৰে পুৱা বেবেজীয়া ষ্টেচনৰ সমীপৰ এটা পুখুৰীত ওপঙি থকা অৱস্থাত উদ্ধাৰ হয় এজন যুৱকৰ মৃতদেহ । মৃতদেহটো বেবেজীয়া খাটগুৰি গাঁওৰ নিৱাসী মন্টু কুমাৰ নাথৰ পুত্ৰ দীপজ্যোতি নাথ বুলি চিনাক্ত কৰা হৈছে । জানিব পৰা মতে, পুৱতি নিশা নিজগৃহৰ শোৱাপাটিৰ পৰা হঠাৎ বাহিৰলৈ উঠি অহা যুৱকজন সেই সময়ৰ সন্ধানহীন হৈ আছিল । পুৱা পৰিয়ালৰ লোকে যুৱকজনক ঘৰত নেদেখি বিচাৰ খোচাৰ কৰাত ঘৰৰ চৌহদতে থকা এটা পুখুৰীত উপঙি থকা অৱস্থাত প্ৰত্যক্ষ কৰে মৃতদেহটো ।

অতি অমায়িক, সৎ প্ৰকৃতিৰ যুৱকজনৰ মৃতদেহ এইদৰে উদ্ধাৰ হোৱাত ৰহস্যৰ সৃষ্টি হৈছে । কিছু লোকে এয়া এক আত্মহত্যা বুলি সন্দেহ প্ৰকাশ কৰিছে যদিও অন্য একাংশ এয়া এক হত্যাকাণ্ড বুলি ক'ব খোজে । অৱশ্যে, মৃতদেহটোত কোনো ধৰণৰ আঘাতৰ চিন পৰিলক্ষিত হোৱা নাই । ইপিনে, ঘটনাৰ খবৰ লাভ কৰাৰ পিছতেই বেবেজীয়া আৰক্ষীয়ে মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে নগাঁও ভোগেশ্বৰী ফুকননী অসামৰিক চিকিৎসালয়লৈ প্ৰেৰণ কৰাৰ লগতে তদন্ত আৰম্ভ কৰিছে । আৰক্ষীৰ তদন্তহে যুৱকজনৰ মৃত্যুৰ ৰহস্য পোহৰলৈ আহিব ।