কামাখ্যা-মুৰ্কংচেলেক যাত্ৰীবাহী ৰেলত যাত্ৰীৰ পৰিৱৰ্তে সৰবৰাহ হয় চোৰাং সামগ্ৰী,  যাত্ৰীৰ দুৰ্ভোগ

যিসময়ত অসমৰ ৰেল যাত্ৰীৰ সুৰক্ষাক লৈ প্ৰতিমূহুৰ্ততে প্ৰশ্ন উত্থাপিত হৈ আহিছে সেই সময়তে যেন ক্ৰমাৎ অপৰাধীৰ ৰম্যভূমিত পৰিণত হৈছে উত্তৰ পূৱ সীমান্ত ৰেলৱেৰ ৰেল সেৱাত ৷ মানৱ সৰবৰাহ, চুৰি, ডকাইতি,ধৰ্ষণ, হত্যা আদি বহু ঘটনাই সংঘটিত হৈ আহিছে যাত্ৰীবাহি ৰেলসমূহত ৷ 

উল্লেখ্য যে,কামাখ্যাৰ পৰা মুৰ্কংচেলেক অভিমুখী লাচিত এক্সপ্ৰেছ নামৰ যাত্রীবাহি ৰেল খনত যাত্ৰীৰ পৰিবৰ্তে ডবা সমুহত সৰবৰাহ হয় চোৰাং সামগ্ৰী ভৰ্তি বস্তা । ফলত টিকট সংগ্ৰহৰ পিছতো যাত্ৰী সকলে নিজৰ আসন খন বিছাৰি হাহাকাৰ কৰিব লগা অৱস্থাৰ সৃষ্টি হয় ৷ দীৰ্ঘদিনৰে পৰা উথ্বাপিত হৈ অহা অভিযোগৰ ভিত্তিত এই প্ৰতিবেদক সহ এটা সাংবাদিকৰ দল যোৱা নিশা নাৰায়ণপুৰৰ তাঁতিবাহাৰ ৰেল ষ্টেচনত উপস্থিত হৈ দেখা পোৱা গ'ল ৰেল বিভাগৰ উক্ত কুকাৰ্য ।

শীত-তাপ নিয়ন্ত্ৰীত দবা কেইটাৰ বাহিৰে আন প্ৰতিটো দবাতেই দেখা পোৱা গ'ল অবৈধ কাৰ্যকলাপ । য'ত দৃষ্টিগোছৰ হ'ল যাত্রী উঠিব বহিব নোৱাৰাকৈ সামগ্ৰী ভৰ্তি বস্তা৷ দীৰ্ঘদিন ধৰি চলি অহা এই অবৈধ কাৰ্যকলাপৰ ফলত অসহ্যকৰ হৈ পৰাত যাত্রীসকলে ৰেল আৰক্ষীক বাৰম্বাৰ অভিযোগ উত্থাপন কৰাৰ পিছতো চকু মুদা কুলিৰ ভাওঁহে ধৰি আহিছে ৰেল আৰক্ষীয়ে । 

আনহাতে ঘটনাস্থলীত উপস্থিত হোৱা সাংবাদিকৰ দলটোক ফটো সংগ্ৰহটো বাধা প্ৰদান কৰাৰ লগতে কেমেৰা পৰ্যন্ত ভাঙি পেলোৱাৰ ভাবুকি প্ৰদান কৰে ৰেল আৰক্ষীৰ জোৱানে  ৷ ৰেল আৰক্ষীৰ এনে কৰ্মকাণ্ডই প্ৰমাণ কৰি দেখুওৱালে চোৰাং সৰবহৰাহকাৰীৰে ৰেল আৰক্ষীৰ থকা গোপন সম্পৰ্কৰ কথা ।

যি সময়ত পৰিবৰ্তনৰ শ্ল'গানেৰে ক্ষমতা দখল কৰা বিজেপি নেতৃত্বাধীন চৰকাৰৰ কেন্দ্ৰীয় ৰেল ৰাজ্য মন্ত্রী ৰাজেন গোহাঁইয়ে সাধাৰণ যাত্রীৰ বাবে ৰেল সেৱা সুৰক্ষিত বুলি বিভিন্ন সময়ত দম্ভালি মাৰি আহিছে সেই সময়তে উত্তৰ-পূৱ সীমান্ত ৰেলৱেৰ ৰেল সেৱা পৰ্যবসিত হৈছে চোৰাং সবৰাহকাৰীৰ ঘাটিলৈ ৷ এতিয়া প্ৰশ্ন হয় এই ক্ষেত্ৰত মন্ত্ৰী ৰাজেন গোহাঁইয়ে কিবা পদক্ষেপ গ্ৰহণ কৰিব পাৰিবনে ।