পশ্চিম বংগৰ পৰা কেঁচা জলকীয়া কঢ়িয়াই অনা বলেৰ' পিকআপ ভান বঙাইগাঁৱত দুৰ্ঘটনাগ্ৰস্ত:থিতাতে নিহত হেণ্ডিমেন

বঙাইগাঁঁৱৰ প্ৰতিবেদক:

বঙাইগাঁও থানাৰ অন্তৰ্গত চাপৰাকাটাৰ ৰাষ্ট্ৰীয় ঘাই পথত দেওবাৰে পুৱা সামগ্ৰী কঢ়িওৱা এখন বলেৰ' পিকআপ ভান এখন দুৰ্ঘটনাগ্ৰস্ত হোৱাত বাহনখনৰ হেণ্ডিমেনজন থিতাতে নিহত হোৱাৰ বিপৰীতে চালকৰ লগতে বাহনখনত থকা আন এজন লোক গুৰুতৰভাৱে আহত হয় ৷ জানিব পৰা মতে পুৱা ৪ঃ ৩০ মান বজাত পশ্চিম বংগৰ মালদাৰ পৰা বৰপেটালৈ বুলি কেঁচা জলকীয়া কঢ়িয়াই অনা ডব্লিউ বি ৬৯ এ- ৩৬১৮ নম্বৰৰ তীব্ৰ বেগী বলেৰ' পিকআপ ভানখন বঙাইগাঁৱৰ চাপৰাকাটাস্থিত সেনা বাহিনীৰ কেম্পৰ ওচৰ পোৱাৰ সময়তে পথৰ ওপৰত থকা গাঁত এটাত পৰাত বাহনখনৰ আগৰ সোঁফালৰ  চকাটো ফুটি যোৱাত চালকজনে বাহনখনৰ নিয়ন্ত্ৰণ হেৰুৱাই পথৰ মাজত থকা ডিভাইডাৰত খুন্দা মাৰে ৷ ফলত বাহনখনৰ পিছৰ চকা দুটাও ফুটি যোৱাত ডিভাইডাৰ পাৰ হৈ গৈ ৰাখালডুবিৰ পৰা বঙাইগাঁওলৈ অহা দিশৰ পথৰ ওপৰত বাগৰি পৰে ৷ এই দুৰ্ঘটনাৰ ফলত বাহনখনত থকা পশ্চিম বংগৰ আলিপুৰদুৱাৰ জিলাৰ কুমাৰগ্ৰাম থানাৰ অন্তৰ্গত পশ্চিম নাৰাৰথলী গাঁওৰ সম্বাৰু ৰায়ৰ পুত্ৰ তথা বাহনখনৰ হেণ্ডিমেন বিশ্বজিৎ ৰায় ( ২০ ) বাহনখনৰ তলত পৰাত থিতাতে মৃত্যু হয় ৷ আনহাতে দুৰ্ঘটনাটোত বাহনখনৰ চালক তথা আলিপুৰদুৱাৰ জিলাৰ শামুকতোলা থানাৰ অন্তৰ্গত উত্তৰ পৰোকাটাৰ সুনিল দাসৰ পুত্ৰ শহদেৱ দাস( ৩০) আৰু  বাহনখনত থকা পশ্চিম নাৰাৰথলীৰ অনন্ত ৰায়(৩২) গুৰুতৰভাৱে আহত হয় ৷ পিচত দুৰ্ঘটনাৰ খবৰ পাই বঙাইগাঁওৰ যান-বাহন শাখাৰ আৰক্ষী ঘটনাস্থলীত উপস্থিত হৈ গুৰুতৰভাৱে আহতদ্বয়ক উদ্ধাৰ কৰি বঙাইগাঁও অসামৰিক চিকিৎসালয়লৈ প্ৰেৰণ কৰে ৷ আনহাতে দুৰ্ঘটনাগ্ৰস্ত বাহনখনৰ তলৰ পৰা হেণ্ডিমেনজনৰ মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে বঙাইগাঁও অসামৰিক চিকিৎসালয়লৈ প্ৰেৰণ কৰাৰ লগতে দুৰ্ঘটনাগ্ৰস্ত বাহনখনো উদ্ধাৰ কৰি থানালৈ লৈ আহে ৷ 

প্ৰণৱ কুমাৰ ডেে
বঙাইগাঁ