বৈদ্যগড় আঞ্চলিক ছাত্ৰ সন্থাৰ অভিনন্দন অনুষ্ঠান

কামৰূপ জিলা ছাত্ৰ সন্থাৰ অন্তৰ্গত বৈদ্যগড় আঞ্চলিক ছাত্ৰ সন্থাৰ বিশেষ অভিনন্দন অনুষ্ঠানখন আজি তুলসীবাৰী বহুমুখী উচ্চতৰ মাধ্যমিক বিদ্যালয়ত অনুষ্ঠিত হয় ।
অনুষ্ঠানত বৈদ্যগড় অঞ্চলৰ বিভিন্ন শিক্ষানুষ্ঠানৰ পৰা সদ্যঘোষিত হাইস্কুল, হাইমাদ্ৰাছা আৰু উচ্চতৰ মাধ্যমিক চূড়ান্ত পৰীক্ষাত কৃতিত্ব অৰ্জন কৰা ছাত্ৰ-ছাত্ৰীসকলক অভিনন্দন জ্ঞাপন কৰা হয় ।

পুৱা বৈদ্যগড় আঞ্চলিক ছাত্ৰ সন্থাৰ সভাপতি বিশ্বজিৎ কলিতাই সদৌ অসম ছাত্ৰ সন্থাৰ পতাকা উত্তোলন কৰে । বৈদ্যগড় ছাত্ৰ সন্থাৰ সাধাৰণ সম্পাদক ভূপেন কলিতাই ছহিদ তৰ্পণ কৰে ।

বিশ্বজিৎ কলিতাৰ সভাপতিত্বত অনুষ্ঠিত বিশেষ অভিনন্দন অনুষ্ঠানখন উদ্বোধন কৰে সদৌ কামৰূপ জিলা ছাত্ৰ সন্থাৰ উপ-সভাপতি গোলোক ৰাজবংশীয়ে ৷ 
তেখেতে উদ্বোধনী ভাষণত ছাত্ৰ-ছাত্ৰীসকলক শিক্ষাৰ লগতে সামাজিক কৰ্মৰ জৰিয়তে আগবাঢ়ি যাবলৈ আহ্বান জনায় ।

বৰ্তমান সময়ত বহু ছাত্ৰ-ছাত্ৰীয়ে শিক্ষা-দীক্ষা লৈও নিজৰ পিতৃ-মাতৃক পাহৰি যায় ।  ভাল শিক্ষা লৈ ছাত্ৰ-ছাত্ৰীসকলক দেশৰ হৈ কাম কৰি যাবলৈও তেওঁ আহ্বান জনায় । মুখ্য অতিথি হিচাপে উপস্থিত থাকি নিউজ লাইভৰ ৰাজনৈতিক সম্পাদক ছায়ামণি ভূঞাই কয় যে ছাত্ৰ-ছাত্ৰীসকলে ইতিবাচক চিন্তাৰে আগঢ়াৰ লগতে নিজৰ ওপৰত আত্মবিশ্বাস ৰাখিব লাগে ৷

ভিতৰুৱা অঞ্চলৰ পৰা অসমৰ একো একোটা সম্পদ সৃষ্টি হয় বুলি তেওঁ উল্লেখ কৰি লগতে কৃতিমান ছাত্ৰ-ছাত্ৰীসকল আমাৰ লগতে দেশৰ সম্পদ বুলি কয় । এখন সৰু গাঁৱৰ পৰা আহি আজি মহান অনুষ্ঠান এটাত কথা ক'বলৈ পাই গৌৰৱান্বিত বুলিও তেওঁ উল্লেখ কৰে ।

কুলধৰ শইকীয়াকে আদি কৰি বহুতো ভাল ভাল বিষয়া এই অঞ্চলৰ পৰাই সৃষ্টি হৈছে আৰু আজিৰ কৃতিমানসকলো এটা সময়ত ইয়াৰ পৰা গৈয়ে একোজন ভাল বিষয়া হ'ব বুলি তেওঁৰ বক্তব্যত কয় ।

ইণ্টাৰনেটৰ জৰিয়তে ছাত্ৰ-ছাত্ৰীসকলক প্ৰতিদিনে নতুন নতুন শিক্ষা আহৰণ কৰিবলৈও তেওঁ আহ্বান জনায় । ভাল কামৰ চিন্তাৰে ছাত্ৰ-ছাত্ৰীসকলক আগবাঢ়ি যোৱাৰ কথাও তেওঁ ভাষণ প্ৰসংগত উল্লেখ কৰে ।

অনুষ্ঠানত তুলসীবাৰী উচ্চতৰ মাধ্যামিক বিদ্যালয়ৰ অধ্যক্ষ লীনু বৰদলৈয়ে কয় যে ছাত্ৰ-ছাত্ৰীসকল আমাৰ মানৱ সম্পদ । ছাত্ৰ-ছাত্ৰীসকলক লৈ আমি গৌৰৱ কৰোঁ ৷ তেওঁলোকৰ ভাল ফলাফলে আমাক আনন্দিত কৰে বুলিও তেওঁ ব্যক্ত কৰে ।

সদৌ কামৰূপ জিলা ছাত্ৰ সন্থাৰ উপদেষ্টা ধীৰাজ ৰাজবংশীয়ে কৃতিমান ছাত্ৰ-ছাত্ৰীসকলে ভৱিষ্যৎ দিনত শিক্ষা-দীক্ষা লোৱাৰ লগতে সামাজিকভাৱে দায়বদ্ধ হ'বলৈ আহ্বান জনায় ।

তেওঁ ছাত্ৰ-ছাত্ৰীসকলক প্ৰথমে মানুহ হোৱাৰ বাবে আহ্বান জনায় । শিক্ষা-দিক্ষা লৈ ছাত্ৰ-ছাত্ৰীসকলে দেশ আৰু জাতিৰ প্ৰতি দায়বদ্ধ হ'বলৈও তেওঁ আহ্বান জনায় । সদৌ কামৰূপ জিলা ছাত্ৰ সন্থাৰ সাধাৰণ সম্পাদক হেমন্ত দাসে কয় যে বৰ্তমান ব্যৱসায়িক শিক্ষা ব্যৱস্থাই শিক্ষাৰ মানদণ্ড নিম্ন কৰিছে ।

শিক্ষাৰ মানদণ্ড উন্নত হ'লেহে ছাত্ৰ-ছাত্ৰীসকল উপকৃত হ'ব পাৰিব বুলিও তেওঁ লগতে উল্লেখ কৰে । বৰ্তমান সময়ত ছাত্ৰ-ছাত্ৰীসকলক ভাল শিক্ষা, ভাল শিক্ষানুষ্ঠান, উপযুক্ত কৰ্মসংস্থাপনৰ ব্যৱস্থা কৰি দিব লাগিব বুলি উল্লেখ কৰি ছাত্ৰ-ছাত্ৰীসকলক অধ্যয়নৰ লগতে সামাজিকভাৱে দায়বদ্ধ হ'বলৈও আহ্বান জনায় ।

অভিনন্দন অনুষ্ঠানত সদৌ কামৰূপ জিলা ছাত্ৰ সন্থাৰ সভাপতি দিবাকৰ কলিতাই কয় যে মোবাইলে ছাত্ৰ-ছাত্ৰীৰ শৈক্ষিক ক্ষেত্ৰত যথেষ্ট প্ৰভাৱ পেলাইছে । বহু ছাত্ৰ-ছাত্ৰীয়ে শিক্ষা গ্ৰহণতকৈ মোবাইলত বেছি গুৰুত্ব দিয়াৰ ফলত শিক্ষা গ্ৰহণত প্ৰভাৱ পৰাৰ কথা উল্লেখ কৰি কয় যে ছাত্ৰ-ছাত্ৰীসকলে 'মই পাৰিম' এই আত্মবিশ্বাস লৈ আগবাঢ়িলে সফলতা আহিবই ।

ছাত্ৰ-ছাত্ৰীসকলে ঋণাত্মক মনোভাবেৰে কোনো কথা চিন্তা কৰিব নালাগে বুলিও তেখেতে কয় । অনুষ্ঠানটোত কামৰূপ জিলা ছাত্ৰ সন্থাৰ উপ-সভাপতি ৰুবুল দাস, মহকুমা ছাত্ৰ সন্থাৰ সভাপতি হেমেন দাস, সাধাৰণ সম্পাদক ভৱজ্যোতি ডেকা, শিক্ষা সম্পাদক তৌফিকুৰ ৰহমান, জিতু ডেকা, নিউটন কলিতা আদি কেইবাগৰাকীও ছাত্ৰ নেতা উপস্থিত থাকে ।

কৃতিমান ছাত্ৰ-ছাত্ৰীসকলক গামোচা, সম্বৰ্ধনা-পত্ৰৰে অভিনন্দন জনোৱা হয় ।