ধুহিত পথ মেৰামতিৰ দাবীত আছুৰ পথ অৱৰোধ

ধুহি চ'ক বজাৰ আৰু বাৰাংহাটী সংযোগী পথটি জৰাজীৰ্ণ হৈ থকাৰ ফলত বৃহত্তৰ ধুহি অঞ্চলৰ লগতে স্কুলীয়া ছাত্ৰ-ছাত্ৰী তথা সৰ্বসাধাৰণ ৰাইজ যথেষ্ট অসুবিধাৰ সন্মুখীন হ'বলগীয়া হৈছে ।

এজাক বৰষুণতে পথটিত একাঁঠু পৰ্যন্ত পানী হোৱাৰ লগতে বৃহৎ বৃহৎ গাঁতৰ সৃষ্টি হোৱা বাবে যাতায়াতৰ ক্ষেত্ৰত যথেষ্ট অসুবিধাৰ সন্মুখীন হ'বলগীয়া হৈছে । আজি ধুহি ছাত্ৰ সন্থাই পথটি মেৰামতিৰ দাবীত পথ অৱৰোধ কৰি গড়কপ্তানি বিভাগ হায় হায়, ৰাস্তা-ঘাট নিৰ্মাণ কৰিব নোৱাৰা বিজেপি চৰকাৰৰ হায় হায় আদি শ্লোগান দি পৰিৱেশ উত্তপ্ত কৰি তোলে ।

পথ অৱৰোধস্থলীত উপস্থিত থাকি সদৌ কামৰূপ জিলা ছাত্ৰ সন্থাৰ সাঃ সম্পাদক হেমন্ত দাসে কয় যে পৰিৱৰ্তনৰ শ্লোগান আওৰাই চৰকাৰ গঠন কৰিবলৈ সক্ষম হোৱা বিজেপি নেতৃত্বাধীন মিত্ৰজোঁট চৰকাৰখনে ৰাস্তা-ঘাট নিৰ্মাণ কৰিব নোৱাৰাটো দুৰ্ভাগ্যজনক ।

ধুহি চ'ক বজাৰ আৰু বাৰাংহাটী সংযোগী পথটো কেইবাবছৰ ধৰি জৰাজীৰ্ণ হৈ থকাৰ ফলত যাতায়াতৰ ক্ষেত্ৰত যথেষষ্ট অসুবিধাৰ সন্মুখীন হ'বলগীয়া হৈছে । স্থানীয় বিধায়কে কোনো গুৰুত্ব নিদিয়াৰ লগতে গড়কপ্তানি বিভাগৰ হেমাহিৰ বাবে পথটো জৰাজীৰ্ণ হৈ থাকিল ।

সেয়ে প্ৰতিবাদস্থলীৰ পৰা চৰকাৰ তথা গড়কপ্তানি বিভাগক শীঘ্ৰে পথটো মেৰামতি কৰি যাতায়াতৰ ক্ষেত্ৰত উপযোগী কৰি তোলাৰ বাবে দাবী জনায় ৷ অন্যথা ছাত্ৰ সন্থাই ইয়াতকৈ জংগী আন্দোলন কৰিবলৈ বাধ্য হ'ব বুলিও উল্লেখ কৰে ।

আজিৰ প্ৰতিবাদী কাৰ্যসূচীত উপস্থিত থাকে ৰঙিয়া আঞ্চলিক ছাত্ৰ সন্থাৰ সভাপতি জিতু ডেকা, সাঃ সম্পাদক নিউটন কলিতা, সহকাৰী সম্পাদক জয়ন্ত শৰ্মা, ৰাহুল আমিনসহ ভালেসংখ্যক ছাত্ৰকৰ্মী । 

পিছত ধুহি ছাত্ৰ সন্থাৰ সভাপতি মেহবুব আলম আৰু সাঃ সম্পাদক ৰিজবুল আহমেদ স্বাক্ষৰিত স্মাৰক-পত্ৰখন কঙা ৰাজহ চক্ৰ বিষয়াৰ জৰিয়তে গড়কপ্তানি মন্ত্ৰীলৈ প্ৰেৰণ কৰে ।