বঙাইগাঁৱত সাংবাদিকৰ গৃহত চুৰি

বঙাইগাঁৱৰ পৰা প্ৰণৱ কুমাৰ ডেকা

বঙাইগাঁও  চহৰৰ ১৭ নম্বৰ ৱাৰ্ড তথা দুই নম্বৰ ৰেল গে'টৰ সমীপৰ নিবাসী শিৱাণী ভৌমিকৰ বাসগৃহত  সোমবাৰৰ বিয়লিৰ ভাগত চুৰিৰ ঘটনা সংঘটিত হয় ৷ শিৱাণী ভৌমিক কলকাতাত আত্মীয়ৰ ঘৰত থকাৰ বিপৰীতে সাংবাদিক পুত্ৰ- বোৱাৰীয়ে পহিলা ব'হাগ উপলক্ষে নিউ বঙাইগাঁও বিজি কলনিৰ দোকানত পূজা কৰাৰ বাবে যোৱাৰ সময়তে ঘৰত কোনো নথকাৰ সুযোগত চোৰৰ দলে  চুৰি কাণ্ড সংঘটিত কৰে ৷ 

জানিব পৰা মতে, শিৱাণী ভৌমিকৰ গৃহত বিয়লিৰ ভাগত চোৰৰ দলে দেৱাল বগাই প্ৰৱেশ কৰাৰ লগতে ঘৰৰ দুৱাৰৰ তলা ভাঙি সোমায় ৷ ঘৰৰ ভিতৰত চোৰৰ দলে পৰিয়ালটোৰ শ্ব'কেজ,ষ্টিল আলমিৰা ভঙাৰ লগতে বস্তু- বাহানি লণ্ডভণ্ড কৰে ৷ 

গধূলি পৰিয়ালটোৰ সদস্য তথা 'দৈনিক যুগশংখ' কাকতৰ বঙাইগাঁৱৰ প্ৰতিনিধি  জ্যোতিৰ্ময় ভৌমিক পৰিয়ালসহ দোকানৰ পৰা অহাৰ পিছতহে চুৰি হোৱা ঘটনা পোহৰলৈ আহে ৷ জানিব পৰা মতে, চোৰৰ দলে ষ্টিল আলমিৰাত থকা নগদ কুৰি হেজাৰ টকা, অনুমানিক চল্লিশ হেজাৰ টকা মূল্যৰ সোণৰ অলংকাৰ লুট কৰি নিয়ে ।

 ঘটনা সন্দৰ্ভত সাংবাদিক জ্যোতিৰ্ময় ভৌমিকে বঙাইগাঁও সদৰ থানাত এক এজাহাৰ দাখিল কৰিছে ৷