শংকৰদেৱ নগৰত ‘সুধাকণ্ঠ’ৰ মৃত্যু তিথিত ডেকাগিৰি বঁটা প্ৰদান

ডবকাৰ পৰা জমিৰউদ্দিন তালুকদাৰ

হোজাইৰ সামাজিক, সাংস্কৃতিক অনুষ্ঠান শ্ৰীমন্ত শংকৰদেৱ কৃষ্টি বিকাশ কেন্দ্ৰই আজি সুধাকণ্ঠ ডঃ ভূপেন হাজৰিকাৰ সপ্তম মৃত্যু বাৰ্ষিকী উদযাপন কৰে ৷ অনুষ্ঠানটিয়ে যোৱা সাত বছৰৰ পৰা ধাৰাবাহিকভাৱে ভূপেন হাজৰিকাৰ মৃত্যু বাৰ্ষিকী পালন কৰাৰ লগতে দিনটোৰ লগত সংগতি ৰাখি ডেকাগিৰি বঁটাও প্ৰদান কৰি আহিছে ৷ আজি দিনজোৰা কাৰ্যসূচীৰে অনুষ্ঠানটিৰ বাকৰিত অনুষ্ঠিত এক গাম্ভীৰ্যপূৰ্ণ সভাত লামডিঙৰ সুজিত সোম নামৰ এজন ব্যক্তিক চলিত বৰ্ষৰ ডেকাগিৰি বঁটা প্ৰদান কৰা হয় ৷

সভাখনত অসম চৰকাৰৰ জলসম্পদ মন্ত্ৰী কেশৱ মহন্ত, অসমীয়া বোলছবি জগতৰ মোহময়ী অভিনেত্ৰী মলয়া গোস্বামীয়ে চলিত বৰ্ষৰ ডেকাগিৰি বঁটাটি তুলি দিয়ে ৷ বঁটাৰ লগত এখন মানপত্ৰ, শৰাই, জাপি, চেলেঙৰ লগতে নগদ ধনো আগবঢ়োৱা হয় ৷ কাৰ্যসূচীৰ আৰম্ভণিতে ‘সুধাকণ্ঠ’ৰ প্ৰতিমূৰ্তিত মাল্যাৰ্পণ কৰে অসম চৰকাৰৰ জলসম্পদ মন্ত্ৰী গৰাকীয়ে ৷ অনুষ্ঠানটিত বৃহত্তৰ ডবকা নাগৰিক মঞ্চই ডবকা অঞ্চলৰ বিভিন্ন সমস্যা সম্বলিত এখনি স্মাৰক পত্ৰও মন্ত্ৰী গৰাকীৰ হাতত অৰ্পণ কৰে ৷

ডবকাৰ যমুনা নৈৰ ওপৰত থকা বৃটিছৰ দিনৰ ভঙা দলংখন নিৰ্মাণ কৰা, ডবকা নগৰ সংযুক্ত কৰা ৰাজ্যিক পথবোৰ নিৰ্মাণ কৰাৰ উপৰি ডবকা গড়কাপ্টানী পৰিদৰ্শন বাংলাৰ পুনৰ নিৰ্মাণৰ দাবী উত্থাপন কৰা হয় ৷ একেদৰে ডবকা চহৰত বিশ্বৰত্ন ডঃ ভূপেন হাজৰিকাৰ নামত এটি পুথিভঁৰাল স্থাপনৰ দাবীও স্মাৰক পত্ৰত উল্লেখ কৰা হয় ৷ নাগৰিক সমিতিৰ হৈ উপস্থিত থাকে আলহাজ আব্দুৰ ৰহমান বৰভূঞা, অধ্যাপক ৰছিদ আহমেদ, ফাৰুক আহমেদ, নুৰুল হুছেইন, আব্দুল জলিল পাটোৱাৰী, বদৰুল ইছলাম বেগ ৷