মহানগৰীত চৰকাৰৰ বিৰুদ্ধে ডি ৱাই এফ আইৰ প্ৰতিবাদী সমদল

ৰাজ্যত নিবনুৱা সমস্যা দিনক দিনে ভয়াৱহভাৱে বৃদ্ধি হোৱা, নাগৰিকত্ব সংশোধনী বিধেয়ক গৃহীত কৰি হিন্দু বঙালীক নাগৰিকত্ব প্ৰদান, ৰাজ্য চৰকাৰৰ চতুৰ্থ বৰ্গৰ চাকৰি বন্ধ কৰি ঠিকাভিত্তিত নিয়োগ কৰা, কেন্দ্ৰীয় চৰকাৰে বছৰি ২ কোটিকৈ নিবনুৱাক সংস্থাপন দিয়া প্ৰতিশ্ৰুতি পূৰণ কৰিব নোৱাৰাৰ লগতে হাইস্কুল আৰু টে'ট শিক্ষকৰ চাকৰি নিয়মীয়াকৰণ কৰাৰ দাবীৰে আজি এক প্ৰতিবাদী সমদল উলিয়ায় ভাৰতীয় গণতান্ত্ৰিক যুৱ ফেডাৰেচনে ।

পুৱা ১১ বজাত উলিওৱা উক্ত প্ৰতিবাদী সমদলত অংশগ্ৰহণ কৰে সংগঠনটোৰ ভালেসংখ্যক সদস্যই । মহানগৰীৰ দীঘলীপুখুৰীপাৰৰ পৰা উপায়ুক্ত কাৰ্যলয়লৈ উলিওৱা এই প্ৰতিবাদী সমদলৰ জৰিয়তে সংগঠনটোৱে নাগৰিকত্ব সংশোধনী বিধেয়ক বাতিল কৰা, অপ্ৰাদেশীকৃত বিদ্যালয়সমূহ প্ৰাদেশিকীকৰণ কৰাৰ দাবী জনায় ৷

ইয়াৰ উপৰি বৰ্তমান ভয়াৱহভাৱে হোৱা মূল্যবৃদ্ধি নিয়ন্ত্ৰণলৈ অনাৰো দাবী উত্থাপন কৰে সংগঠনটোৱে ৷ আনহাতে, নাগৰিকসকলৰ সুবিধাৰ অর্থে দেশৰ সৰ্বোচ্চ ন্যায়ালয়ে এন আৰ চিৰ ৫বিধ নথি বৈধ ঘোষণা কৰিব লাগে বুলিও দাবী জনায় ।

প্ৰতিবাদৰ অন্তত সংগঠনটোৱে জিলা উপায়ুক্ত বীৰেন্দ্ৰ মিট্টালৰ জৰিয়তে ৰাজ্যৰ মুখ্য মন্ত্ৰীলৈ এক স্মাৰক-পত্ৰও প্ৰদান কৰে ৷