মূল্যবৃদ্ধি ৰোধৰ দাবীত কৃষক মুক্তিৰ মহানগৰীত উত্তাল প্ৰতিবাদ

অত্যাৱশ্যকীয় সামগ্ৰীৰ মূল্যবৃদ্ধি ৰোধ কৰাৰ দাবীৰে আজি গুৱাহাটী মহানগৰী উত্তাল কৰি তোলে কৃষক মুক্তি সংগ্ৰাম সমিতিয়ে । পুৱা ১০.৩০ বজাত গুৱাহাটী ক্লাবৰ পৰা আৰম্ভ হোৱা এই প্ৰতিবাদী কাৰ্যসূচীত অংশগ্ৰহণ কৰে কৃষক নেতা অখিল গগৈ প্ৰমুখ্যে সংগঠনটোৰ ভালেসংখ্যক নেতা-কর্মীয়ে ।

তেওঁলোকৰ দাবী, পেট্ৰ'ল-ডিজেল, ৰন্ধন গেছৰ মূল্য হ্ৰাস হ'ব লাগে ৷ লগতে বাছৰ যি ভাড়া বৃদ্ধি কৰা হ'ল সেই ভাড়া বৃদ্ধিৰ হাৰ অতি সোনকালে হ্ৰাস কৰি জনসাধৰণক সকাহ দিব লাগে ।

প্ৰতিবাদী কাৰ্যসূচীত অংশগ্ৰহণ কৰি কৃষক নেতা অখিল গগৈয়ে কয় যে চৰকাৰখনে কেৱল পুঁজিপতিসকলৰ স্বাৰ্থত কাম কৰি আছে । তেওঁৰ দাবী, পেট্ৰ'ল-ডিজেলত যি অত্যধিক কৰ আৰোপ কৰা হৈছে সেই কৰ অতি সোনকালে হ্ৰাস কৰিব লাগে আৰু জনসাধাৰণক ইয়াৰ পৰা সকাহ দিব লাগে ।

লগতে তেওঁ কয় যে অকল যে পেট্ৰ'ল-ডিজেলৰ মূল্যবৃদ্ধি হৈছে তেনে নহয় ৷ এতিয়া ইটা, বালি, শিল, ৰড সকলোৰে মূল্যবৃদ্ধি কৰিছে চৰকাৰখনে । যি নেকি সাধাৰণ ৰাইজৰ বাবে চিন্তাৰ কাৰণ ।

গুৱাহাটী ক্লাবৰ পৰা আৰম্ভ হোৱা এই প্ৰতিবাদী কাৰ্যসূচী অন্ত পৰে দিনৰ ১ বজাত গুৱাহাটীৰ মেঘদূত ভৱনৰ সন্মুখত । প্ৰতিবাদৰ অন্তত কৃষক নেতা অখিল গগৈসহ ৫জন সদস্যই ৰাজ্যপালক লগ ধৰি ৫টা দাবীসম্বলিত এক স্মাৰক-পত্ৰ প্ৰদান কৰে ।