সুধাকণ্ঠ ভূপেন হাজৰিকাৰ জন্মদিনৰ লগত সংগতি ৰাখি গহপুৰৰ বিভিন্ন দল-সংগঠনকে ধৰি বিদ্যালয়-মহাবিদ্যালয়সমূহত সুধাকণ্ঠগৰাকীৰ গীত-মাতেৰে গহপুৰৰ চৌপাশ মুখৰিত কৰি তোলে ।
চেংমৰাত থকা ভূপেন হাজৰিকাৰ প্ৰতিমূৰ্তিস্থলত অসম জাতীয়তাবাদী যুৱ পৰিষদৰ গহপুৰ আঞ্চলিক সমিতিয়ে সশ্ৰদ্ধ স্মৰণ কৰাৰ লগতে বন্তি প্ৰজ্বলন কৰে । উক্ত অনুষ্ঠানত নৱ-প্ৰজন্মক সুধাকণ্ঠগৰাকীৰ আদৰ্শৰে আগুৱাই যাবলৈ আহ্বান জনায় ।
বৰ্তমান সমাজত ক্ৰমে হেৰাই অহা মানৱীয় মূল্যবোধসমূহৰ প্ৰসাৰৰ বাবে সুধাকণ্ঠ ভূপেন হাজৰিকাৰ নীতি আদৰ্শৰে আগুৱাই যাবৰ বাবে মন্তব্য আগবঢ়ায় সংগঠনটোৱে।
উপস্থিত থাকে অসম জাতীয়তাবাদী যুৱ পৰিষদৰ গহপুৰ আঞ্চলিকৰ সভাপতি প্ৰাচুল বৰুৱা, ভাৰপ্ৰাপ্ত সম্পাদক কুমুদ দাস, পূব গহপুৰ শাখা সম্পাদক ধৰ্মৰাজ বৰুৱা, কৃষ্ণ শইকীয়াৰ লগতে একাধিক সদস্য ।
সমান্তৰালভাৱে গহপুৰৰ ঐতিহ্যমণ্ডিত বৰপুখুৰীত গহপুৰ শাখা অখিল ভাৰতীয় বিদ্যাৰ্থী পৰিষদে বন্তি প্ৰজ্বলন কৰে । বন্তি প্ৰজ্বলনৰ শুভাৰাম্ভ কৰে গহপুৰ মহকুমাৰ গহপুৰ আৰক্ষী বিষয়া তিলক দাসে ।
সেই কাৰ্যসূচীত অখিল ভাৰতীয় বিদ্যাৰ্থী পৰিষদৰ গহপুৰ শাখা সম্পাদক ভাস্কৰ হাজৰিকা, নিলোৎপল ভূঞাৰ লগতে ছয়দুৱাৰ মহাবিদ্যালয়ৰ ভালেসংখ্যক ছাত্ৰ-ছাত্ৰী উপস্থিত থাকে ।
গহপুৰৰ চৰকাৰী-বেচকাৰী সকলো বিদ্যালয়তে সুধাকণ্ঠৰ জন্মজয়ন্তী উদ্যাপন কৰে ।
- Log in to post comments
- 12 views
