তামুলপুৰ বাণিজ্য মহাবিদ্যালয়ত আছুৰ জয়যাত্ৰা

তামুলপুৰ বাণিজ্যি মহাবিদ্যালয়ত ছাত্ৰ একতা সভাৰ নিৰ্বাচনত আছু সমৰ্থিত প্ৰাৰ্থীয়ে দুটাকৈ গুৰুত্বপূৰ্ণ পদত জয়লাভ কৰিবলৈ সক্ষম হৈছে ।

ভোট গণনাৰ অন্তত ছাত্ৰ একতা সভাৰ সধাৰণ সম্পাদক পদত আছু সমৰ্থিত প্ৰাৰ্থী চন্দন শৰণীয়াই ২৫১ আৰু ক্ৰীড়া সম্পাদক পদত কৰণ চেত্ৰীয়ে ২৫৩টা ভোট লাভ কৰি জয়লাভ কৰে ।

ফলাফল ঘোষণাৰ পিছতে তামুলপুৰ আঞ্চলিক ছাত্ৰ সন্থাৰ কাৰ্যালয়ত এক উৎসৱমুখৰ পৰিবেশৰ সৃষ্টি হয় । আছুৰ কৰ্মীসকলে ফটকা, আতচবাজী ফুটাই আনন্দত আত্মহাৰা হৈ পৰে ।

ইপিনে আজি সন্ধিয়া ৭ বজাত তামুলপুৰ আঞ্চলিক ছাত্ৰ সন্থাৰ মুখ্য কাৰ্যালয়ত এক অভিনন্দন অনুষ্ঠান অনুষ্ঠিত হয় । তামুলপুৰ আঞ্চলিক ছাত্ৰ সন্থাৰ সভাপতি দমন পাটোৱাৰীয়ে আঁতধৰা অনুষ্ঠানটোত উপস্থিত থাকি সদৌ অসম ছাত্ৰ সন্থাৰ ক্ৰীড়া সম্পাদক পূৰ্ণ ডেকাই দুয়োগৰাকী বিজয়ী প্ৰাৰ্থীলৈ শুভেচ্ছা জ্ঞাপন কৰে ।

মহাবিদ্যালয়খনৰ শৈক্ষিক পৰিৱেশ অধিক উন্নত কৰাৰ বাবে দুযোগৰাকী প্ৰাৰ্থীকে মনোনিবেশ কৰিবলৈ আছু নেতাজনে আহ্বান জনায় ।

অনুষ্ঠানত সদৌ তামুলপুৰ মহকুমা ছাত্ৰ সন্থাৰ সাধাৰণ সম্পাদক কুমুদ ডেকা, তামুলপুৰ আঞ্চলিক ছাত্ৰ সন্থাৰ সাধাৰণ সম্পাদক অনুপ কলিতাকে ধৰি কেইবাগৰাকীও আছু নেতা-কৰ্মী উপস্থিত থাকে ।

অনুষ্ঠানত দুয়োগৰাকী বিজয়ী প্ৰাৰ্থীক ফুলাম গামোচাৰে অভিনন্দন জ্ঞাপন কৰে ।