বৰপেটাৰোডৰ কংগ্ৰেছ কাৰ্য্যালয়ত ওলমিল বিজেপিৰ পতাকা :: কংগ্ৰেছী মহলত তীব্ৰ প্ৰতিক্ৰিয়া

বৰপেটাৰোডৰ পৰা ৰঞ্জিত তালুকদাৰৰ প্ৰতিবেদন :

বৰপেটাৰোড ৰেলৱে ষ্টেচনৰ সমীপত অৱস্থিত কংগ্ৰেছ দলৰ কাৰ্য্যালয় ৰাজীৱ ভৱনত এখনি বৃহৎ আকাৰৰ বিজেপি দলৰ পতাকা ওলমি থকাত চহৰখনৰ কংগ্ৰেছী মহলত তীব্ৰ প্ৰতিক্ৰিয়াৰ সৃষ্টি হৈছে ৷

বিজেপি দলৰ পতাকাখন কংগ্ৰেছ অফিচত ওলমি থকাৰ খবৰ পাইয়ে কংগ্ৰেছ সেৱা দলৰ উত্তৰ  পূৰ্বাঞ্চলৰ তত্বাবধায়ক ধীৰাজ দেউৰী, গোৱৰ্ধনা ব্লক কংগ্ৰেছৰ সভাপতি ফাৰুক আব্দুল্লাহ সমন্বিতে কংগ্ৰেছৰ নেতা কৰ্মী সকল কাৰ্য্যালয়টোত উপস্থিত হৈ এই কাৰ্য্যৰ তীব্ৰ প্ৰতিবাদ জনায় ৷

তদুপৰি লগে লগে তেওঁলোকে বিজেপিৰ পতাকাখন নমাই আনি কাষৰ নলাত পেলাই দিয়ে ৷
বিজেপিৰ পতাকাখন কংগ্ৰেছ অফিচত কোনে কি উদ্দেশ্যে ওলমালে সেয়া নিশ্চিত হোৱা নাই যদিও একাংশ লোকে এয়া কংগ্ৰেছ বিৰোধী চক্ৰৰ কাৰ্য্য বুলি সন্দেহ প্ৰকাশ কৰিছে ৷

কংগ্ৰেছ নেতা সকলে কংগ্ৰেছ বিৰোধী চক্ৰটোক এনে ধৰণৰ দু্ষ্কাৰ্য্যৰ পৰা বিৰত থাকিবলৈও সকীয়াই দিয়ে ৷ 

অন্যথা তেওঁলোকেও ইয়াৰ উচিত উত্তৰ সময়ত দিবলৈ কুণ্ঠাবোধ নকৰে বুলি মন্তব্য কৰে ৷