বঙাইগাঁৱত চাৰি বছৰীয়া শিশুক যৌন নিৰ্যাতন 

বঙাইগাঁও সদৰ থানাৰ অন্তৰ্গত উত্তৰ মাজগাৱত যুৱক এজনে নিজৰ বিকৃত মানসিকতাৰ পৰিচয় দি এজনী চাৰি বছৰীয়া শিশুক যৌন নিৰ্যাতন চলোৱা ঘটনাক লৈ অঞ্চলজুৰি তীব্ৰ প্ৰতিক্ৰিয়াৰ সৃষ্টি হৈছে ৷ ইতিমধ্যে এই জঘন্য ঘটনা সংঘটিত কৰা মাণিক মণ্ডল (২৮) নামৰ পাষণ্ড যুৱকজন পলায়ণ কৰিছে ৷ উল্লেখ্য যে এখন গেলামাল দোকানৰ গৰাকী মাণিক মণ্ডলে বৃহস্পতিবাৰে সন্ধিয়া ওচৰতে থকা আন এখন দোকানৰ গৰাকীৰ নাতিনী তথা চাৰি বছৰীয়া শিশুটিক ফুচুলাই নিজৰ দোকানলৈ মাতি নি যৌন নিৰ্যাতন চলায় ৷

পিছত শিশুটিৰ মাকে এই বিষয়ে জানিব পৰাত সমগ্ৰ ঘটনাটো পোহৰলৈ আহে ৷ ঘটনা সন্দৰ্ভত শিশুটিৰ পৰিয়ালে আজি যুৱকজনৰ বিৰুদ্ধে থানাত এজাহাৰ দাখিল কৰে ৷ ইপিনে ঘটনাটো পোহৰলৈ অহাৰ পিছতে পলায়ণ কৰিছে পাষণ্ড মাণিক মণ্ডলে ৷ মাণিক মণ্ডলৰ প্ৰকৃত ঘৰ বঙাইগাঁও জিলাৰ কীৰ্তনপাৰাত ৷ আৰক্ষীয়ে ইতিমধ্যে শিশুটিৰ স্বাস্থ্য পৰীক্ষা কৰিছে ৷ স্থানীয় ৰাইজে যুৱকজনক কৰায়ত্ত কৰি কঠোৰ শাস্তি প্ৰদানৰ দাবী জনাইছে ৷ উল্লেখ্য যে শিশুটিয়ে মাকৰ লগত ককাকৰ ঘৰলৈ ফুৰিবলৈ আহিছিল ৷