নগাঁৱত এটিএম ভাঙি ধন লুটৰ চেষ্টা:দুই যুৱকক গ্ৰেপ্তাৰ

নগাঁঁৱৰ পৰা ৱাহিদুদ জামান:

নগাঁৱৰ আৰক্ষীৰ জালত পৰিল এ টি এমৰ পৰা ধন লুটৰ চেষ্টা চলোৱা দুজন যুৱক। নগাওঁ আৰক্ষীয়ে জনোৱা মতে শনিবাৰে নিশা নগাওঁ চহৰৰ ৰাম কৃষ্ণ পথৰ মনসা মন্দিৰ চাৰিয়ালিত থকা ষ্টেট বেংকৰ এটিএমত এজন যুৱকে লকাৰ ভাঙি ধন লুট কৰাৰ চেষ্টা চলাই থকা অৱস্থাত নগাওঁ যান-বাহন আৰক্ষীৰ তহলদাৰী দলে প্ৰত্যক্ষ কৰে।লগে লগে তেওঁলোকে নগাওঁ সদৰ থানাৰ ভাৰপ্ৰাপ্ত বিষয়াক অৱগত কৰে।বিষয়াগৰাকীয়ে তৎপৰতাৰে ব্যৱস্থা গ্ৰহণ কৰি ইটাচালি আৰক্ষী,নগাওঁ সদৰ থানাৰ আৰক্ষী,যান-বাহন আৰক্ষী আৰু চিআৰপিএফ বাহিনীৰ সহযোগত ধন লুটাৰ চেষ্টা কৰা যুৱকজনক আটক কৰিবলৈ সক্ষম হয়।আৰক্ষীয়ে আটক কৰা যুৱকজন হ'ল জিলাখনৰ কলিয়াবৰৰ পুৰণি সত্ৰৰ প্ৰাঞ্জল বৰা(৩০)। প্ৰাঞ্জল বৰাৰ স্বীকাৰোক্তিৰ ভিত্তিত নগাওঁ আৰক্ষীয়ে নগাওঁ আৱৰ্ত ভৱনৰ সন্মুখৰ পৰাই পংকজ বৰা (১৯) নামৰ আন এজন যুৱকক প্ৰেপ্তাৰ কৰিবলৈ সক্ষম হয়।পংকজৰ ঘৰ নগাওঁ চহৰৰ সমীপৰ হুজ গাঁৱত।জানিব পৰা মতে আৱৰ্ত ভৱনৰ সন্মুখৰ এটা মুকলি প্ৰেক্ষাগৃহত অতি সংগোপনে আশ্ৰয় লৈ এই দুই যুৱকে দুষ্কাৰ্য সংঘটিত কৰি আহিছে।আৰক্ষী সূত্ৰই জনোৱা মতে ধৃত প্ৰাঞ্জল বৰা দীৰ্ঘদিন ধৰি বিভিন্ন অপৰাধমূলক কাৰ্য্যত জড়িত হৈ আহিছে।