ছুপাহিট হোৱাৰ দিশে ৰণবীৰ অভিনীত ‘সঞ্জু’

ছুপাৰিহিট হোৱাৰ দিশে ৰণবীৰ অভিনীত ‘সঞ্জু’

নিউজ এএছএন নিউজ ডেস্ক

গুৱাহাটী, ৩০ জুন : বক্স অফিচত ধুমুহা সৃষ্টিৰ দিশে অগ্ৰসৰ হৈছে ৰণবীৰ কাপুৰ অভিনীত ছৱি ‘সঞ্জু’। বিতকই লগ নেৰা বলীউড তাৰকা সঞ্জয় দত্তৰ বাস্তৱ জীৱনৰ আধাৰত নিৰ্মিত ছৱিখনে কালি মুক্তিলাভ কৰে। ছৱিগৃহলৈ অহাৰ প্ৰথম দিনটোতে ছৱিখনৰ উপাৰ্জন হয় প্ৰায় ৩৫ কোটি টকা। পৰ্যবেক্ষকসকলৰ ধাৰণা অনুসৰি অহা ৩ দিনৰ ভিতৰতে ছৱিখনৰ উপাৰ্জনে ১০০ কোটিৰ ঘৰ অতিক্ৰম কৰিব।

উল্লেখ্য, ‘সঞ্জু’ৰ পৰিচালনা যশস্বী পৰিচালক ৰাজকুমাৰ হিৰাণীৰ। ৰাজকুমাৰ হিৰাণীৰ আন দুখন ছৱি ‘পি কে’ আৰু ‘থ্ৰি ইডিয়টছে’ ইতিমধ্যে ব্লকবাষ্টাৰ ছৱিৰূপে অভিলেখ ৰচি থৈছে। লক্ষণীয়ভাৱে, মুক্তিলাভৰ বহুদিন আগৰেপৰাই ‘সঞ্জু’ ছৱিখন চৰ্চ্চাৰ কেন্দ্ৰবিন্দু হৈ পৰিছিল। অভিনেতা ৰণবীৰৰ বাবে পৰম স্বস্তিৰ বিষয় হৈ পৰিছে ‘সঞ্জু’ ছৱিখন। একেৰাহে ভালে কেইখন ছৱি ফ্লপ হোৱাৰ পাছত এখন হিট ছৱিৰ অপেক্ষাত আছিল জনপ্ৰিয় অভিনেতাজন। নতুন ছৱিখনত সঞ্জয় দত্তৰ বাস্তৱ চৰিত্ৰ ৰূপায়ণত অভাৱনীয় সাফল্য অৰ্জন কৰা ৰণবীৰৰ অভিনয় প্ৰতিভাক কঠোৰ সমালোচকসকলেও উচ্চ প্ৰশংসা কৰিছে।