কৃষক আৰু প্ৰশাসনৰ মাজত সম্পৰ্ক সুদৃঢ় কৰাৰ প্ৰয়াস মৰিগাঁও জিলা উপায়ুক্তৰ

মৰিগাঁৱৰ পৰা জিতুমণি নাথ

কৃষক আৰু জিলা প্ৰশাসনৰ মাজত সম্পৰ্ক সুদৃঢ় কৰাৰ বাবে মৰিগাঁও জিলা উপায়ুক্ত ঋতুৰাজ বৰাই গ্ৰহণ কৰিছে এক বিশেষ পদক্ষেপ। উপায়ুক্ত গৰাকীয়ে গ্ৰহণ কৰা পদক্ষেপৰ অংশ হিছাপে আজি জিলা খনৰ থেকেৰা বিলৰ ওচৰত থকা মৎস্য পালকৰ মৎস্য পদ্ধতি, চৰাইবাহীৰ বৰভগীয়াত প্ৰভাত নাথৰ অমিতা খেতি, দন্দুৱাত অৱসৰ প্ৰাপ্ত সেনা ত্ৰৈলোক্য ডেকাৰ গৰু ফাৰ্ম আদি কৰি কেইবা  ঠাইটো কৃষক সকলে কৰা কৃষি কাৰ্য পৰিদৰ্শণ কৰি কৃষকসকলক উৎসাহিত কৰে। উপায়ুক্ত ঋতুৰাজ বৰাৰ নেতৃত্বত কৃষকসকলে ৰূপায়ণ কৰা কাৰ্যক্ষেত্ৰ পৰিদৰ্শনৰ সময়ত সংগ দিয়ে অতিৰিক্ত উপায়ুক্ত ডা০ তহিদুৰ ৰহমান, জিলা মীন বিষয়া উৎপল বৰা, জিলা পশুচিকিৎসা বিষয়া ডা০ অনিল ডেকাকে আদি কৰি জিলা প্ৰশাসনৰ কেইবাজনো বিষয়াই। কৃষক সকলে স্বাৱলম্বিতা ক্ষেত্ৰত কৰা কৃষি কাৰ্যত সন্তষ্টি প্ৰকাশ কৰি উপায়ুক্ত ঋতুৰাজ বৰাই কয়, কৃষক সকলে নিজৰ শ্ৰমেৰে এনেদৰে আগবাঢ়ি অহাটো অতিকৈ শুভ লক্ষণ। ইয়াৰ জৰিয়তে অনান্য যুৱক-যুৱতী সকলকো নিশ্চিতভাবে প্ৰেৰণা যোগাব। এই ক্ষেত্ৰত জিলা প্ৰশাসনৰ ফালৰ পৰা কৃষকসকলক পাৰ্যমানে সহায় সহযোগিতা কৰিবলৈ চেষ্টা কৰা হ’ব বুলি মন্তব্য কৰে।