স্বাধীনতা দিৱসৰ প্ৰাক্‌মুহূৰ্তত ওদালগুৰিৰ আমজুলিত দুৰ্বৃত্তই উৰুৱালে ক'লা পতাকা 

দেশজুৰি ৭২সংখ্যক স্বাধীনতা দিৱস উদ্‌যাপনৰ সময়তে স্বাধীনতাক নস্যাৎ কৰি ৰাজ্যৰ কেইবাটাও অঞ্চলত ক'লা পতাকা উৰি থকা দেখিবলৈ পোৱা গ'ল ।

স্বাধীনতা দিৱস উদ্‌যাপনৰ প্ৰাক্‌ক্ষণত ওদালগুৰি চহৰৰ পৰা প্ৰায় ২০ কিঃমিঃ উত্তৰ-পশ্চিম দিশত অৱস্থিত  ১নং আমজুলিৰ এখন মধ্য ইংৰাজী বিদ্যালয়ত নিশা দুৰ্বৃত্ত‌ই ক'লা পতাকা উৰুওৱা কাণ্ডই অঞ্চলটোত চাঞ্চল্যৰ সৃষ্টি কৰা পৰিলক্ষিত হৈছে । 

 ওদালগুৰি শিক্ষা খণ্ডৰ অন্তৰ্গত ১নং মিলনজ্যোতি মধ্য ইংৰাজী বিদ্যালয়ত নিশা দুৰ্বৃত্ত‌ই উৰুৱাই থৈ যায় পতাকাখন । পুৱা প্ৰায় ৬.৩০ বজাত বিদ্যালয়খনৰ চকীদাৰগৰাকী বিদ্যালয়ত উপস্থিত হৈ ঘটনাটি প্ৰত্যক্ষ কৰি প্ৰধান শিক্ষকক অৱগত কৰে ।

পিছত প্ৰধান শিক্ষকে বিষয়টো প্ৰশাসনক অৱগত কৰে । ইয়াৰ পাছত ঘটনাস্থলীত হৰিশিঙা আৰক্ষীৰ লগতে অতিৰিক্ত আৰক্ষী অধীক্ষক অভিজিৎ গৌতম উপস্থিত হৈ পতাকাখন জব্দ কৰে ।

কোনে এই কাণ্ড সংঘটিত কৰিলে সেয়া এতিয়াও পোহৰলৈ অহা নাই যদিও আৰক্ষীয়ে তদন্ত অব্যাহত ৰাখিছে বুলি জানিব পৰা গৈছে ।