ওদালগুৰিৰ ৰাণীপুখুৰীত সেনাবাহিনীক আবদ্ধ কৰি ৰাখিলে স্থানীয় ৰাইজে

ওদালগুৰি জিলাৰ কলাইগাঁও থানাৰ অন্তৰ্গত ৰাণীপুখুৰীৰ ১নং ঝাৰগাঁৱত ৰাইজে আবদ্ধ কৰে সেনাবাহিনীৰ এটা দলক ৷ উল্লেখ্য যে যোৱানিশা অঞ্চলটোৰ কাঠমিস্ত্ৰী জনৈক ইছলামুদ্দিন আলীক সেনাই আটক কৰি লৈ যায় ৷

আটক কৰা জনৈক আলীক পুৱতিনিশা পৰিয়ালক গতাই দিবলৈ অহাৰ সময়তে সেনাৰ দলটিক স্থানীয় ৰাইজে আবদ্ধ কৰি উত্তপ্ত পৰিস্থিতিৰ সৃষ্টি কৰে । জানিব পৰামতে অবৈধ অস্ত্ৰৰ সন্ধানত জনৈক আলীক সেনা দলটিয়ে আটক কৰিছিল ।

ইফালে সেনা দলটিক আবদ্ধ কৰাৰ খবৰ পোৱাৰ লগে লগে ভেৰগাঁৱৰ মহকুমা আৰক্ষী বিষয়া বৰুণ পুৰকায়স্থ আৰু কলাইগাঁও থানাৰ আৰক্ষী বিষয়া ডিম্বেশ্বৰ দাস ঘটনাস্থলীত গৈ উপস্থিত হয় ৷

ঘটনাস্থলীত উপস্থিত হৈ আৰক্ষী বিষয়া দুগৰাকীয়ে প্ৰতিবাদী ৰাইজক বুজনি দি পৰিস্থিতি নিয়ন্ত্ৰণলৈ আনে । আৰক্ষী বিষয়া দুগৰাকীয়ে স্থানীয় আমছু, এবি আমছুৰ লগতে ৰাইজৰ মুৰব্বীৰ লগত আলোচনামৰ্মে সেনাৰ দলটিক উদ্ধাৰ কৰি লৈ যায় ।