বইটামাৰীৰ দেৱান গাঁৱত অগ্নিকাণ্ডত জাহ গ'ল কৃষি পাম, পাৱাৰ টিলা ভস্মীভূত 

বঙাইগাঁও জিলাৰ নৰ্থ বইটামাৰীৰ দেৱান গাঁৱত নিশা সংঘটিত হয় ব্যাপক অগ্নিকাণ্ড । জানিব পৰা মতে, গাওঁখনত থকা যোগেশ নাথ নামৰ লোকজনৰ ব্যক্তিগত কৃষি পামখনত যোৱা নিশা হোৱা অগ্নিকাণ্ডৰ ফলত কৃষি পামৰ গৃহ  জুইত জাহ যায় । তাৰোপৰি তাতে থকা যোগেশ নাথৰ পাৱাৰ টিলাৰখনো জুইত জাহ যায় ।

লগতে খেৰৰ পুঁজিটোও ভস্মীভূত হয় । পুৱাহে এই অগ্নিকাণ্ডৰ বিষয়ে লোকজন অৱগত হয় । কোনো দুৰ্বৃত্তই আক্ৰোশমূলকভাৱে কৃষিপামখনত অগ্নিসংযোগ কৰা বুলি লোকজনে অভিযোগ কৰিছে । আনহাতে, উক্ত অগ্নিকাণ্ডত কাষতে থকা চৰকাৰী মুগা পামখনৰো ক্ষতিসাধন হয় । পামখনৰ কেইবা ঠাইতো জুই লগাৰ ফলত চোম গছসমূহৰ ক্ষতি হয় ।

চৰকাৰী মুগা পামখনৰ  কৰ্মচাৰীসকলে চৰকাৰী কোৱাৰ্টাৰত নিশা নাথাকি নিজৰ বাসগৃহত নৈশ যাপন কৰাৰ অভিযোগ কৰিছে একাংশ লোকে । চৰকাৰী দৰমহা ভোগ কৰি কৰ্মচাৰীসকলে কৰ্তব্যত গাফিলতি কৰাৰ অভিযোগ উত্থাপিত হৈছে । মুগা পামখনক লৈ সংশ্লিষ্ট কৰ্তৃপক্ষয়ো কোনো গুৰুত্ব প্ৰদান কৰা নাই ।