নগাঁও আৰক্ষীৰ বিশেষ অভিযানত আটক ড্ৰাগচ মাফিয়া

নগাঁৱৰ পৰা ঋতুপৰ্ণ শৰ্মা

নগাঁও জিলা আৰক্ষী অধীক্ষক শঙ্কৰব্ৰত ৰায় মেধি বৰ্তমান নগাঁৱৰ ড্ৰাগচ মাফিয়া চক্ৰৰ বাবে মুৰৰ কামোৰনি হৈ পৰিছে ৷ ভাৰতীয় আৰক্ষী সেৱাৰ সুদক্ষ বিষয়াগৰাকীয়ে নগাঁও জিলাত যোগদান কৰিয়েই ড্ৰাগচৰ বিৰুদ্ধে আৰক্ষীৰ এটি বিশেষ গোট গঠন কৰি দিয়াৰ পিছৰে পৰা ব্যাপক হাৰত গ্ৰেপ্তাৰ হৈছে নিষিদ্ধ ড্ৰাগচৰ চোৰাং ব্যৱসায়ত জড়িত বহু কেইটা মাফিয়া ৷ নগাঁওবাসী সচেটন ৰাইজে যুৱ তথা উদ্যমী আৰক্ষী অধীক্ষকগৰাকীৰ কৰ্মস্পৃহাক কৰিছে ভূয়ষী প্ৰশংসা ৷ 

সোমবাৰে নিশাও নগাঁও চহৰৰ কলংপাৰ এলেকাত গোপন সুত্ৰৰ পম খেদি আৰক্ষীয়ে এটা ড্ৰাগচ মাফিয়াক আটক কৰে ৷ ভৱেন দাস নামৰ মাফিয়া চক্ৰৰ সদস্যজনৰ পৰা ড্ৰাগচ বিক্ৰী কৰা নগদ ৪২,০৪০ টকাৰ লগতে ৬টা ম'বাইল ফোন, ড্ৰাগচ সেৱনৰ বাবে ব্যৱহাৰ কৰা ৪৬টা কনটেইনাৰসহ ১২ ডাল লাইটাৰ জব্দ কৰে ৷ 
বদলি সূত্ৰে নগাঁৱৰ টি এছ আই হিচাপে যোগদান কৰিয়েই আৰক্ষী বিষয়া গৌৰৱ জ্যোতি মহন্তই সদৰ অ'চি শৈলেন দেউৰীৰ তথা আৰক্ষী

দলৰ সহযোগত বিশেষ অভিযান চলাই ভৱেন দাসক আটক কৰাৰ লগতে নগদ ধন আৰু সামগ্ৰীসমূহ জব্দ কৰে ৷ আজি গ্ৰেপ্তাৰ কৰা ড্ৰাগচ মাফিয়াটোক আদালতত হাজিৰ কৰা হয় বুলি জানিব পৰা গৈছে ৷