নগাঁৱৰ পৰা ঋতু পৰ্ণ শৰ্মা
আকৌ আহি পালে দেহত আবিৰ সানি আত্মীয়-কুটুম্ব, ওচৰ-চুবুৰীয়া, বন্ধু-বান্ধৱৰ সৈতে আনন্দত উটি-ভাহি যোৱা ৰঙৰ উৎসৱ ''ফাঁকুৱা'' । নানা ৰঙৰ সমাহাৰৰে মানুহৰ দেহ-মন ৰঙাই তোলা এই ফল্গুৎসৱৰ বাবে যেন মধ্য অসমৰ নগাঁৱৰ বিভিন্ন প্ৰান্তত সকলো সাজু হৈ উঠিছে । সদা ব্যস্ত নগাঁও চহৰৰ যান্ত্ৰিকতা আৰু ব্যস্ততাক একাষৰীয়া কৰি অধিকাংশ লোকেই প্ৰতিবছৰে ফাগুন মাহৰ এই ৰঙৰ উৎসৱত বিলীন হৈ পৰে ।
আনন্দ-উল্লাসৰ মাজেৰে বিভিন্নজনে ফাঁকুৱা উদ্যাপন কৰাৰ লগতে নগাঁও চহৰৰ কেতবোৰ স্থানত হোলী গীত গাই একাংশ লোকে পৰম্পৰা ৰক্ষা কৰে তথা ৰাজপথত হাতে-হাতে ৰঙীন ফাঁকু লৈ যুৱক-যুৱতীসকল ফাঁকুৱাৰ ৰঙত মতলীয়া হৈ পৰে । ফাঁকুৱাক আদৰিবলৈ সকলোৱে প্ৰস্তুতি অব্যাহত ৰখাৰ সময়ত ব্যস্ত হৈ পৰিছে নগঞা ব্যৱসায়ীসকল । বজাৰত ফাকু গুৰিৰ লগতে শিশুৰ বাবে ফিচকাৰি, টুপী, মুখা আদি বিভিন্ন সামগ্ৰীৰে ভৰি পৰিছে নগাঁৱৰ বজাৰ ।
পূৰ্বতে বজাৰত ওলোৱা বাহুৱলী ফিচকাৰি, ছোটা ভীম ফিচকাৰি, মোডী মাস্ক আৰু স্পাইডাৰমেন মাস্ক গ্ৰাহকৰ বিশেষ আকৰ্ষণ লাভ কৰিছিল । কিন্তু এইবাৰ নিৰ্বাচনৰ প্ৰাক্মুহূৰ্তত সলনি হৈছে নগাঁৱৰ বজাৰৰ পৰিৱেশ । বজাৰত এতিয়া নিৰ্বাচনী চমক । গ্ৰাহকক আৰ্কষণ কৰিবলৈ ব্যবসায়ীয়ে বজাৰত উলিয়াইছে মোডী টি-চাৰ্ট, মোডী ফিচকাৰি আৰু মোডী টুপীৰ লগতে অন্যান্য সামগ্ৰী ।
যাৰ ফলত ইয়াৰ প্ৰতি আকৰ্ষণ বৃদ্ধি পোৱা পৰিলক্ষিত হৈছে । বসন্তকালীন এই উৎসৱৰ মাদকতা সুকীয়া । বহুতে কয় ফাকু খেলিলে জ্বৰৰ প্ৰভাৱৰ পৰা মুক্ত হৈ থাকিব পাৰি । জনবিশ্বাস আছে যে ফাকুৰ ৰঙে বসন্ত ৰোগ প্ৰতিৰোধ কৰে। কথাটো অসত্য নহয় । চিকিৎসকৰ মতে ৰঙা ৰঙৰ ফাকুত থকা মাৰকিউৰিক আয়'ব্ৰাইডৰ কিছুমান ৰোগৰ বীজাণু ধ্বংস কৰাৰ ক্ষমতা থাকে । কিন্তু বজাৰৰ ফাকুৱে এই ক্ষমতা কিমাননো বহন কৰে সেয়া বিচাৰ্য বিষয় ।
বজাৰত এতিয়া ভেজাল ফাকুহে বিক্ৰী হয় । নানা ৰাসায়নিক দ্ৰব্য মিহলি এই ভেজাল ফাকুৱে উপকাৰ কৰাৰ পৰিৱৰ্তে অপকাৰহে কৰে ।এই ফাকুৰ পৰা ছালত এলাৰ্জী হোৱাৰ লগতে চকুৰ বিস্তৰ ক্ষতি হয় । এলাৰ্জী হ'লে আক্ৰান্তজনে তৎক্ষণাত আক্ৰান্ত অংশটো ধুই পেলাব লাগে । সেয়া যিয়েই নহওক ফাকুৰ পৰা এই বিড়ম্বনা থাকিলেও ফাকু খেলে মানুহৰ মনত যি আনন্দৰ প্ৰলেপ সানি দিয়ে তাৰ কোনো তুলনা নাই । মনৰ আনন্দ ক্ষণিকৰ বাবে হ'লেও উদ্বেগ-অশান্তি নিৰ্মূল হয় "ফল্গুৎসৱ"ৰ সাৰ্থকতা যেন ইয়াতেই ।
- Log in to post comments
- 47 views
