জালাহৰ পৰা গুঞ্জন দাস
'ছাত্ৰ-ছাত্ৰীসকলে নিজৰ জীৱন সুখৰ আৰু সমৃদ্ধিৰ বাবে কঠোৰ পৰিশ্ৰম কৰিব লাগিব। আজিৰ যুৱ প্ৰজন্মই দেশৰ শাসন ব্যৱস্থা পৰিচালনাৰ বাবে নীতি গ্ৰহণ কৰাৰ সুযোগ লাভ কৰিছে। সমাগত নিৰ্বাচন হৈছে তেওঁলোকৰ এই সুযোগ লাভ কৰাৰ এক পদক্ষেপ। ছাত্ৰ-ছাত্ৰীসকলে শ্ৰেণী কোঠাৰ বাহিৰত অতিৰিক্ত জ্ঞান লাভ কৰাৰ সুযোগ গ্ৰহণ কৰিব লাগে।
কিয়নো তেওঁলোকক আমাৰ পাঠ্যক্ৰমত নিশিকোৱা বহুতো শিক্ষা গ্ৰহণ কৰিবলগীয়া থাকে।' আজি স্হানীয় উচ্চ শিক্ষাৰ একমাত্ৰ প্ৰতিষ্ঠান বি বি কিষাণ মহাবিদ্যালয়ৰ ৪১তম মহাবিদ্যালয় সপ্তাহৰ সামৰণিৰ মুকলি সভাত নিৰ্দিষ্ট বক্তা হিচাপে উপস্থিত থাকি কোকৰাঝাৰ চৰকাৰী মহাবিদ্যালয়ৰ সহযোগী অধ্যাপক ডঃ বেৰলাও কে কাৰ্জীয়ে এইদৰে কয়।
মহাবিদ্যালয়ৰ অধ্যক্ষ ডঃ কেশৱ বসুমতাৰীৰ সভাপতিত্বত অনুষ্ঠিত মুকলি সভাখনত তেওঁ লগতে কয় যে প্ৰতিগৰাকী ছাত্ৰ-ছাত্ৰীয়ে কোনখন শিক্ষানুষ্ঠানত শিক্ষা গ্ৰহণ কৰিছে সেইটো গুৰুত্বপূৰ্ণ নহয়, তেওঁলোকে প্ৰতিযোগিতা মনোভাৱেৰে নিজৰ জীৱন প্ৰতিষ্ঠিত কৰাটোহে অধিক গুৰুত্বপূৰ্ণ বিষয়। বৰ্তমান গোলকীয় গ্ৰাম্য হিচাপে প্ৰতিষ্ঠিত হোৱা পৃথিৱীখনত জীয়াই থাকিবলৈ হ'লে প্ৰতিযোগিতাত উত্তীৰ্ণ হ'ব লাগিব।
সেয়েহে প্ৰতিগৰাকী ছাত্ৰ-ছাত্ৰীয়ে প্ৰতিযোগিতামূলক মনোভাৱেৰে আগবাঢ়ি যোৱাৰ বাবে প্ৰস্তুত হ'ব লাগিব। ছাত্ৰ একতা সভাৰ সাধাৰণ সম্পাদক ভাস্কৰ দাসে উদ্দেশ্য বাখ্যা কৰা সভাখনত মহাবিদ্যালয়ৰ জ্যেষ্ঠ অধ্যাপক ডঃ সোনেশ্বৰ কলিতাই ছাত্ৰ-ছাত্ৰীসকলক মূলৰ পৰা আঁতৰি নাযাবলৈ আহ্বান জনায়।
সভাত এবিভিপিৰ ৰাজ্যিক কাৰ্যনিবাহক সদস্য প্ৰলয় কুমাৰ বড়োৱে ছাত্ৰ-ছাত্ৰীসকলক আমাৰ ঐতিহ্য আৰু সংস্কৃতিৰ উত্তৰণত আগভাগ ল'বলৈ আহ্বান জনায়। মুকলি সভাতেই বিভিন্ন প্ৰতিযোগিতাত অংশগ্ৰহণ কৰি পুৰস্কাৰ লাভ কৰা ছাত্ৰ-ছাত্ৰীসকলক বঁটা প্ৰদান কৰা হয়।
যোৱা ছয় মাৰ্চৰ পৰা অনুষ্ঠিত হোৱা মহাবিদ্যালয় সপ্তাহৰ আজিৰ সামৰণিৰ দিনৰ আৰম্ভণিতে মহাবিদ্যালয়ৰ প্ৰাচীৰ পত্ৰিকা উন্মোচন কৰে মহাবিদ্যালয়ৰ অধ্যক্ষ ডঃ কেশৱ বসুমতাৰীয়ে। মুকলি সভাতেই মহাবিদ্যালয়ৰ ছাত্ৰীদ্বয় গৰিমা হীৰা আৰু প্ৰণামী দাস আৰু সহকাৰী অধ্যাপক গুলছন গয়াৰীয়ে অসমীয়া আৰু বড়ো ভাষাত সঙ্গীত পৰিৱেশন কৰে।
সভাৰ শেষত শলাগ জ্ঞাপন কৰে ছাত্ৰ একতা সভাৰ সাধাৰণ সম্পাদক ভাস্কৰ দাসে। মুকলি সভাৰ সামৰণিৰ পিছত গুৱাহাটীৰ চুমি শৰ্মা আৰু মহাবিদ্যালয়ৰ ছাত্ৰ মনোজ দাসে সঙ্গীত পৰিৱেশন কৰে।
- Log in to post comments
- 5 views
