পুৰণি বঙাইগাঁও হাইস্কুলৰ ৰূপালী জয়ন্তী বৰ্ষ অনুষ্ঠানৰ সামৰণি

বঙাইগাঁৱৰ পুৰণি বঙাইগাঁও হাইস্কুলৰ ৰূপালী জয়ন্তী বৰ্ষৰ সামৰণী অনুষ্ঠানৰ দেওবাৰে সামৰণি পৰে৷ উল্লেখ্য যে শনিবাৰৰ পৰা দুদিনীয়া কাৰ্যসূচীৰে অনুষ্ঠিত হোৱা ৰূপালী জয়ন্তী বৰ্ষৰ সামৰণী অনুষ্ঠানৰ দ্বিতীয় দিনা পুৱাৰ ভাগত আকস্মিক বক্তৃতা, আবৃত্তি আৰু কুইজ প্ৰতিযোগিতা অনুষ্ঠিত হয়৷ একেদৰে অনুষ্ঠিত হয় বিদ্যালয়ৰ প্ৰাক্তন শিক্ষক-শিক্ষয়িত্ৰীসকলৰ লগতে বিদ্যালয়ৰ প্ৰতিষ্ঠালগ্নত জড়িত শুভাকাংক্ষীসকলৰ সম্বৰ্ধনা অনুষ্ঠান৷

আনহাতে, আবেলিৰ ভাগত স্মৃতিগ্ৰন্থ উন্মোচন কৰে বঙাইগাঁও জিলা সাহিত্য সভাৰ সভাপতি অজিত দাসে৷ ইয়াৰ পিছতে অনুষ্ঠিত হয় মুকলি সভা৷ ৰূপালী জয়ন্তী উদ্‌যাপন সমিতিৰ কাৰ্যকৰী সভাপতি সতীন চন্দ্ৰ ৰায়ৰ সভাপতিত্বত অনুষ্ঠিত হোৱা মুকলি সভাত হাউলীৰ বি এইচ কলেজৰ অধ্যক্ষ ডঃ ভূষণ চন্দ্ৰ পাঠকে মুখ্য অতিথি হিচাপে উপস্থিত থাকি বক্তব্য ৰাখে৷

সভাত অভয়াপুৰী মহাবিদ্যালয়ৰ অধ্যাপক ডঃ ধীৰেণ শৰ্মাই নিৰ্দিষ্ট বক্তা আৰু বঙাইগাঁও মহাবিদ্যালয়ৰ অধ্যক্ষ ডঃ হিতেশ দাস, বীৰঝৰা কন্যা মহাবিদ্যালয়ৰ ভাৰপ্ৰাপ্ত অধ্যক্ষা নলিনী বৈশ্য আৰু বঙাইগাঁও ৰে'লৱে' উচ্চতৰ মাধ্যমিক বিদ্যালয়ৰ অধ্যক্ষা গীতা দেৱীয়ে আমন্ত্ৰিত অতিথি হিচাপে উপস্থিত থাকি ভাষণ দিয়ে৷

সন্ধিয়া সাংস্কৃতিক অনুষ্ঠান উদ্বোধন কৰে বঙাইগাঁও জিলা পৰিষদৰ সভাপতি বিজয় কুমাৰ সিংহই৷ সাংস্কৃতিক অনুষ্ঠানত স্থানীয় শিল্পীৰ লগতে আমন্ত্ৰিত শিল্পীয়ে অনুষ্ঠান পৰিৱেশন কৰে৷