চামতাত 'উত্তৰণ'ৰ শিশু শ্ৰমিক, মাদক দ্ৰব্য, জুৱাৰ বিৰুদ্ধে বাটৰ নাটেৰে সজাগতা

নলবাৰীৰ পৰা হেমন্ত তালুকদাৰ

সামাজিক ব্যাধি হিচাপে চিহ্নিত শিশু শ্ৰমিক, মদ, ভাং, ড্ৰাগছ আৰু মোবাইলত আনন্দৰ বাবে খেলি একোবিধ খেলক জুৱাৰ শাৰীলৈ নি সমাজত নেতিবাচক প্ৰভাৱ পেলোৱা সমস্যা আদি দাঙি ধৰি নলবাৰীৰ চামতা ‘উত্তৰণ’ নামৰ সামাজিক–সাংস্কৃতিক অনুষ্ঠানটিয়ে ৭ মার্চত জিলাখনৰ চামতাৰ কামৰূপ মহাবিদ্যালয় চৌহদত এখন বাটৰ নাট মঞ্চায়ন কৰে। নৱপ্ৰজন্মৰ কেইগৰাকীমান যুৱকেৰে গঠিত 'উত্তৰণ'ৰ তৰফৰ পৰা মঞ্চায়ন কৰা 'মানুহে মানুহৰ বাবে’ শীৰ্ষক নাটখনৰ ৰচনা আৰু পৰিচালনা নয়নমণি বৰ্মনৰ।

নাটখনত কিশোৰ কৃষ্ণান, ধ্ৰুৱজ্যোতি বৰ্মন, কুলদীপ তালুকদাৰ, প্ৰাণজিৎ দাস, ৰীতুৰাজ শৰ্মা, শুভ্ৰম বৰ্মন, নিৰ্মল কাশ্যপ, কাকলি বৈশ্য আৰু ভাস্বতী বৰ্মনে মনপৰশা অভিনয়েৰে নাটৰ কাহিনীভাগ দৰ্শকৰ সন্মুখত উপস্থাপন কৰিবলৈ সক্ষম হয়। উল্লেখ্য, এই নাটখন ইতিপূৰ্বে নলবাৰী জিলাৰ শিঙিমাৰা, বৰ্ণিবাৰী, ককয়াৰ ঢৌকা বন্ধা, শোলমাৰা আদি অঞ্চলতো মঞ্চায়ন কৰি সমাজত সজাগতা সৃষ্টি কৰিবলৈ সক্ষম হৈছে।